Bishita cu enfoke riba impacto mas grandi riba comunidad esta cuido y educacion
Diasabra mainta e unico Hospital na Aruba, Horacio Oduber Hospital (HOH) a ricibi delegacion di Eerste kamer di Staten- Generaal Hulanda. Meta principal tabata, bou guia di lider di delegacion di Eerste kamer Toine Beukering y director di Hospital Jacco Vroegop, pa intercambia conocemento y alabes papia di e situacion actual di cuido medico na Aruba y e retonan grandi cu tin pa futuro. No solamente tabata invita representantenan di HOH, pero tambe partnernan den cuido esta di Respaldo, Outbreak Management Team, asociacion di specialista ASHA, clinica ImSan y asociacion di dokternan di cas.
A parti e delegacion den dos grupo y asina a duna nan un recorido den Hospital y nan a papia cu diferente colega tocante Unidad di Cuido Intensivo (ICU), departamento di mucha y LabHOH. Nan tabata sumamente impresiona di e hospital bunita y moderno, pero tambe a expresa nan gradicimento na e coleganan cu a demonstra nan pasion pa e trabou y e pashent.
Unabes na mesa a sinta papia di diferente tema nan al caso:
- E importancia di cuido riba e isla pa e 120.000 habitantenan, 20.000 ilegalnan y e 1 miyon turista cu ta bishita nos anualmente. Alabes e posibilidad pa turistanan contribui mas cu meta pa beneficia comunidad di Aruba den ramo di cuido y e hecho cu nan ta haci uzo di e isla y di e facilidadnan di Hospital;
- E oportunidadnan di cuido riba isla y den region, di cual tambe a menciona e sosten enorme di Hulanda y Colombia durante periodo di Covid-19;
- E importancia di bon educacion pa muchanan di e isla cu ta contribui pa por haya mas personal den cuido medico. Tambe a menciona HOH-Academy como centro interno di educacion na HOH;
- E importancia di “good governance” paden y pafo di cuido;
- E cuido cu ta brinda na e ilegalnan y e cuentanan habri a consecuencia di esaki y pues e gastonan cu esaki ta trece cune;
- E necesidad grandi cu tin pa loke ta cuido mental y e budget abou cu tin presupuesta pa esaki;
- E situacion precario pa cuido pa nos grandinan;
- E preocupacion grandi pa loke ta e recortenan impone pa Gobierno di Aruba den cuido medico. Esaki ta hiba na diferencianan enorme entre Reino Hulandes, algun cuido no lo por bay wordo duna mas eventualmente, listanan di espera ta sigui crece, calidad y siguridad di cuido ta bay mas bou di preshon;
- E aumento continuo di gastonan di cuido causa pa inovacion y medicacion costoso, pero tambe e inflacion, invoerrechten, y cada bes mas escasez di personal den cuido di calidad.
- Mantene cuido medico pagabel y acesibel, di cual ningun persona por wordo exclui y ta salvaguardia calidad di cuido continuamente.
“E bishita tabata uno yena di energia! E delegacion a reconoce e trabou duro di tur colega den cuido pa cu e comunidad di Aruba, e ilegalnan y turistanan. Mi tin tur confiansa cu e preguntanan al caso y e informacion duna por trece claridad den tur e desafionan cu Hospital tin, Jacco Vroegop di HOH a termina.
E partnernan den cuido a expresa nan speransa pa hunto cu Hulanda keda busca pa solucionnan pa cuido, enseñansa y siguridad pa Aruba.
E delegacion a termina gradiciendo tur cu a haci e mainta aki posibel, tur e informacion duna y sigur a priminti pa hiba bek Hulanda e conocemento adkiri pa medio di nan bishita.
