Útil i plasentero, asina gezaghèber Edison Rijna a resumí e bishita di trabou di un delegashon di Eerste Kamer. “Ta bon pa mira otro, papia ku otro i prinsipalmente skucha otro en persona. E ora ei tòg bo por bai mas profundo den e asuntunan. Aunke ku pa motibu di e skema di biahe drùk e bishita tabata kòrtiku, mi ta konbensí ku pa ámbos banda e tabata informativo’, segun gezaghèber Rijna.
Despues di yegada na Flamingo Airport tabatin un lùnch ku Kolegio Ehekutivo riba programa na Courtyard by Marriott. Despues di esei nan a parti e delegashon den dos grupo. Un grupo a bai den kòmbersashon ku entre otro suidadanonan, empresarionan i empleadonan públiko tokante kalidat di e gobièrnu aktual, tantu den sentido gubernamental komo den sentido ehekutivo. E otro seshon tabatin pobresa komo tema. Na e diskushon a partisipá entre otro representantenan di dunadónan di trabou i empleadonan, trahadónan sosial, organisashon di konsumidó Unkobon i diputado Nina den Heyer.
“Tur esnan enbolbí tabatin hopi apresio pa e frankesa ku kua a trese e puntonan di bista dilanti. No tur biaha nos ta sinti nos skuchá na Den Haag. P’esei e tipo di bishitanan akí ta útil, pasobra nan ta ofresé nos e oportunidat pa pidi atenshon pa e problemanan ku tin den nos komunidat i ku nos por solushoná solamente ku koperashon di i den diálogo ku Den Haag”, segun gezaghèber Rijna.
E delegashon a konsistí di e miembronan di Eerste Kamer Toine Beukering (lider di delegashon, Frakshon Nanninga), Annemarie Jorritsma-Lebbink (VVD), Ria Oomen-Ruijten (CDA), Boris Dittrich (D66), Jeroen Recourt (Partij van de Arbeid), Arda Gerkens (SP), Peter Ester (ChristenUnie), Peter Nicolaï (Partij voor de Dieren), Martine Baay-Timmerman (50PLUS), Peter Schalk (SGP), Jeroen de Vries (Frakshon Otten) i Ton Raven (OSF). E delegashon tabata atministrativamente kompañá pa Fred Bergman, grefir di komishon, i Maarten van Rooij, funshonario di staf.
E delegashon a kuminsá e bishita di trabou dia 25 di febrüari na Sint Maarten i despues nan a bishitá Saba i Sint Eustatius pa seguidamente biaha pa Boneiru. Mayan mainta e delegashon ta biaha pa Kòrsou. E bishita di trabou ta terminá djasabra na Aruba.
