Siman pasá diputado Thielman a traspasá e funshon di TAO (Territorial Authorized Officer) pa Boneiru na Union Oropeo pa gezaghèber Rijna.
E último añanan e diputado a ehersé e funshon akí, ku ta enserá kordinashon di proyektonan finanshá dor di Union Oropeo den kuadro di desaroyo sostenibel. Durante e periodo di gobernashon aki a finalisá diferente proyekto i tambe a kontinuá òf kuminsá ku vários otro proyekto. Ta trata aki di proyektonan ku ta keda finanshá for di e asina yamá “European Development Fund” (EDF), “Multiannual Indicative Programme” (MIP) i e “Resilience, Sustainable Energy and Marine Biodiversity Programme” (RESEMBID) pa e teritorionan ultramar di Union Oropeo, na kuá Bonaire tambe ta pertenesé.
Na e momentu akí tin 6 proyekto di tamayo andando, entre otro e di 10 EDF i e MIP ku tur dos ta kontribuí na e sistema di kloaka di Boneiru. Banda di esei e di 11 EDF ta andando ku ta enfoká riba hubentut. Den e programa di RESEMBID (resiliensia, energia sostenibel i biodiversidat marino) tambe tin vários proyekto andando, kaminda den e periodo benidero ku tur probabilidat tantu STINAPA komo ofisina di turismo TCB lo haña sosten finansiero prosedente di e programa akí.
Den e programa di RESEMBID Boneiru a hasi tambe e “Post Disaster Need Assessment” (evaluashon di nesesidat despues di kalamidat) pa midi e impakto sosial ekonómiko di COVID riba nos komunidat. A ehekutá e proyekto akí den koperashon ku Banko Mundial i e Programa Mundial di Alimento. Ta usa e rapòrt entre otro den kòmbersashonnan ku Hulanda, pa demonstrá ki impakto e krísis di COVID tin riba Boneiru. Por haña e rapòrt riba wèpsait di Entidat
Públiko Boneiru. Finalmente tin vários otro programa ta kana kaminda ‘stakeholder’ nan di nos isla ta enbolbí.
E eskoho pa hasi gezaghèber e TAO ta ku bista riba kontinuidat i pa strukturá riba termino largu Boneiru su relashonnan internashonal.
Segun diputado Hennyson Thielman: ‘Ta hopi bunita pa por representá Boneiru na Union Oropeo. Sinembargo na mi opinion ta importante awó pa garantisá kontinuidat riba termino largu, pa duna Boneiru e atenshon ku e meresé. Awó ku nos ta saliendo for di e krísis di COVID, mester sigurá ku Boneiru por tin un futuro mas bunita, mas mihó, mas sostenibel i ku mas resiliensia. Mi ta agradesido na gezaghèber ku e ke tuma e funshon akí i mi tin tur konfiansa ku e sa di representá Boneiru fuertemente na Union Orope’.