Diabierna atardi Minister Endy Croes a haci bishita di cortesia na Xavier University School of Medicine Aruba na Hato riba invitacion di e scol. E Mandatario tabata eynan dos aña pasa dia cu e scol a pone e prome piedra pe construccion di un campus nobo. E tempo ey como Parlamentario y awe den su funcion como Minister di Enseñansa y Deporte a mira e desaroyo y realisacion di e campus di Xavier University School of Medicine. Presente ne ocasion tabata Dr. Jamiu Busari, Cabesante di Academia HOH, sr. Frank H. Croes, Miembro Directiva Xavier University Aruba, Dr. Arun Dubey, Rector di Xavier University, Dr. Kevin Pawlak, Cabesante Xavier University Nursing Program, sr. Karel Matthijs, Coordinador Int’l Scol di Nurse, ThomasMore University, Belgica y sra. Cindy Heremans, Coordinador Int’l Scol di Nurse, ThomasMore Univ., Belgica. E Mandatario haya un recorido di e luga. E campus ta conta cu 96 camber unda e studiantenan por biba riba campus. Cada camber maximo 2 persona por keda aden. Den futuro cercano Xavier University School of Medicine Aruba ta bay construi un tower mas di 96 camber. ‘Un compleho masha bunita y espacioso, e tin un piscina, cancha di basketball, cancha di volleyball, un gym y diferente facilidadnan, oficinanan y un cushina’, e Mandatario a expresa. E campus tin pakete cu ta inclui entre otro tres cuminda pa dia pe studiantenan. E di dos fase ta pa traha, auditorio di alrededor 400 pa 500 stoel ultramoderno como tambe e klasnan pa duna les. E Mandatario a sigui bisa nos ta papiando di un inversion total di 60 miyon Dollar cu e Xavier University a inverti na Aruba. E studiante por haci su ‘bachelor’ den medicina y despues por continua cu su ‘master’ tanto na Merca como Canada. E idea ta pa traha mas cerca posibel cu Gobierno di Aruba y instancianan manera entre otro Directie Onderwijs pa den forma di colaboracion sigui reuni cu otro pa mira den ki forma por keda coopera cu otro. ‘E tabata un reunion fuctifero’, e Mandatario a finalisa. Pabien na Xavier School of Medicine Aruba cu un hoya di proyecto!
