Workshop Película y Arte di Video Experimental pa Silvia Martes. Riba Dialuna 7 di Maart pa 6.30pm, lo cuminsa na Ateliers ’89 e workshop “Experimental di Arte di Video”cu e artista ganadora di premio pa su obra esta Silvia Martes. E lo bira un workshop unda no ta rekeri mucho experencia, paso segun Silvia tur hende por traha un película awendia. En principio pa bo por cuminsa bo solamente mester tin un camera pa traha un película.
Y for di einan e calidad/resolucion no ta e parti di mas importante. Ta pa esey mes e por wordo graba cu e camera di bo celular. Den e caso aki ta bay mas pa e tipo di storia cu bo kier conta.
Den e workshop aki lo bin na remarca tur e faceta nan pa dilanti di con ta traha un pelicula experimental. Nos lo cuminsa ta traha un script segun e storia cu bo kier bay conta. Stap pa stap nos lo bay traha pelicula nan hunto te na yega na e ora di montahe. A lo largo nos lo mira con pa uza luz, ki tipo di decor lo ta necesario y con cu tecnica nan simpel por inclui zonido o musica. Asina tur hende ta crea nan pelicula experimental personal unda nos lo termina den un anochi di premiere/screening di e pelicula nan traha door di e participante nan den e workshop, na Ateliers ’89.
Silvia Martes (Eindhoven, 1985) a studia for di September 2009 pa Juli 2013 na Academia Gerrit Rietveld na Amsterdam (Bachelor di arte contemporaneo, Audiovisual) y sigui for di Januari 2019 pa Mei 2021 na Academia di Estado (Rijksakademie) Amsterdam. Recientemente e la duna les na Academia di Gerrit Rietveld.
Martes tabata un di e cuatro nominado nan pa Prix de Rome 2021 y su trabou por a bordo mira na Museo Stedelijk na Amsterdam. Den e mesun aña Silvia a gana e premio di Theodora Niemeijer di Museo Van Abbe na Eindhoven. E peliculanan di Silvia tin di haber cu e genero di ciencia ficcion. Su obra ta bordo caracterisa como liñanan di storia, non-lineaire y ficcion-pseudo. Door di hunga cu berdad nan cu hechonan y cienciaficcion e liñanan di storia ta wordo gelos y kita for di e realidad y ta bira ingarabel. Su peliculanan cortico hopi biaha ta haña nan principio di experencianan autobiografico o ta wordo inspira pa comportamiento humano colectivo. E liña nan di e storia nan ta nace den e proceso cu Martes ta traha su decor nan, e camara ta core, actua, registra y monta.
Pa por inscribi, please manda un mail na elvis@ateliers89.org o yama na 5885776 o 5654613. E workshop aki tambe ta pa un luna y lo termina Diahuebs 31 di Maart. Dia y orario nan ta; di Dialuna pa Diahuebs di 6.30 pa 9.30pm. Edad ta di 12 aña pariba. Ateliers ’89 ta situa na man drechi riba e crusada di Maria College Oranjestad. Tambe por sigui nos na www.Ateliers89.org. No perde e oportunidad unico aki y inscribi awor ya cu cuponan ta limita.
