E siman aki Secreatario di Estado di Hulanda Alexandra van Huffelen ta na Aruba di bishita, como parti di su recorido pa conoce e islanan den Reino Hulandes. Banda di reunionnan cu Gobernador y Gobierno di Aruba, sra. Van Huffelen lo reuni tambe cu esnan den sector di salud, empresarionan local y e lo bishita diferente otro area rond Aruba.
Prome Minister Evelyn Wever – Croes a duna di conoce cu e reunionnan cu a tuma luga diaranson mainta cu Secretario di Estado sra. Alexandra van Huffelen a bay hopi bon. Ta trata di un persona cu tin hopi interes den loke ta sosode na Aruba, con ta atendiendo cu e crisis, aspectonan financiero, economico y ta mustra interes den yuda Aruba bay dilanti. Prome Minister a splica cu na e momentonan aki Aruba continuamente ta traha y percura pa ta den cumplimento cu landspakket y e condicionnan cu ta necesario pa haya sosten di likides. Sinembargo locual cu ta desea ta, pa hunto traha riba un vision a termino largo. ‘Nos tin un vision pa Aruba, awo mester wak con esaki ta alinea cu esun di Binnenlandse Zaken en Koninkrijksrelaties (BZK).’
Sra. Alexandra van Huffelen a expresa di ta sumamente feliz di por ta na Aruba y el a remarca cu prome cu el a yega, ya caba desde shelo e por a admira e beyesa di nos isla.
Pa locual ta e reunionnan, sra. Van Huffelen ta haye importante pa por tene un encuentro personal considerando cu tincu traha cu otro riba diferente tema di importancia, manera entre otro e efecto di pandemia y e bon relacion entre Hulanda y Aruba. ‘Tin hopi pa haci na Aruba y tin hopi tema di preocupacion. Ta spera cu pronto tin e oportunidad pa por traha hunto cu tur esnan concerni, pa por trece mehoracion den calidad di bida’, sra. Van Huffelen a expresa.
Mirando e interes di sra. Van Huffelen den e aspecto social, y pa haya sa mas di Aruba, Premier Wever – Croes a conta di e Social Crisis Plan cu a inicia cu ne na 2017.
Pa conclui Prome Minister a expresa di ta sumamente satisfecho cu con e reunionnan a bay y di e forma aki ta duna inicio na e relacion cu e Secretario di Estado nobo sra. Alexandra van Huffelen.