Y asina un otro dia di amor a pasa. Un otro dia di celebra amor y amistad, cu tin riba kalender e fecha di 14 di Februari. Unda cu bo a bay, e color cora a resalta. Parehanan man den man, nos poetanan cu a comparti nan bunita poema den nos prestigioso corantnan local. Lady Ruth su fin di siman di amor a cuminsa cu firmamento di su bukinan Diasabra na Plaza Bookshop. Nos a pasa un rato masha agradabel combersando cu amantenan di poema. Danki na e gentil y guapo caballero Richard Deluvia, tremendo fotografo di DCA cu a saca bunita potret pa nos por tin historia di nos firmamento di nos buki “Alegria di Ruthy”Poema 2. Y tambe cu e mesun amor un danki grandi pa otro di nos dushi hendenan, e profeshonal Cornel di Tele Aruba 23 y 13, cu a entrevista nos y pone nos “live” riba facebook pa asina Aruba por a wak con bunita e mainta tawata. Cu un danki na gerente y staf y nos amigo Nico Luydens di Plaza Bookshop. E mainta ey nos a ricibi bishita di e.o. colega escritor Poetanan, Desiree Correa, kende a firma su bunita buki “Drama Real” un siman prome, (despues nos lo bin cu e relato di Desi), Ariana”Lady Ari” Chirino Koolman, Laureen Eman, Sergio “Sertjie” Tjie- A- Loi, y di e profesor den literatura cu amor grandi pa Aruba, su cultura y literatura e simpatico Wim Rutgers y su bunita sra.esposa Joke,y un bunita dama hoben adulto, esposa y mama di 2 yui, un sra. cu tambe ta scirbi y expresa su mes den su poemanan na e idioma ingles, Radinka Van Vuurden. Spera cu Lady Ruth ta sigui inspira tur escritor y of Poeta cu ainda no tin publicacion pa nan yega na publica nan obranan bunita. Danki na tur e otro dushi hendenan cu a bin cumpra y laga firma mi buki. Cu un bearhug special pa un otro bunita hende muhe, un di Lady Ruth su “Role-model nan” e simpatico y dynamico sra. Ingrid Nicolaas di Coffee House Smit en Dorlas, cu temponan atras a sinja nos hopi cos den e organisacion di Aruba Female Jaycees ( Of e tempo ey bao di e nomber Aruba Jaycees ), cu tambe a bin busca su buki. Pa conclui nos relato nos ta felicita GO Cultura Foundation cu dynamico Arthur Bryan Loefstok y Edjean Semeleer na cabes y cu nan curason semper inspira den cultura su desaroyo, cu nan exitoso actividad “A night in Venice” Dinner show cu a impacta cu cancionnan di amor den 5 idioma : Italiano, ingles, spanjo, hulandes y nos dushi Papiamento mes, mientras e publico presente por a disfruta y saborea cuminda italiano masha dushi mes, prepara pa Renaissance Seaport Center su cushina cu excelente servicio. E climax riba e bunita anochi di Dia di San Valentino pa nos, tawata, ora Edjean cantando y un barco crusero saliendo for di waaf, pasa patras di e stage, cu turistanan para riba dek ta wak y zwaai bisa ayo Aruba. Hopi bunita pa wak.!
Edjean, riba stage cu companjamento di e gran artista guitarista profeshonal Chriss Kross, kende a companja tambe e gran cantante Rocco Franken. Ki bunita anochi ! Romantico, suave y inspirativo bau di e shelo na strea y bau di e lusnan cu a ilumina e Renaissance Festival Plaza.
Nos bisinjanan di e anochi aki, Marta y Harold de Miranda y Faritah Luydens y su guapo esposo Jan, elegantemente bisti. Un dushi anochi, cu aki aya un pareha ta bayla romanticamente, of e publico cantando refrein di algun di e bunita canticanan. E cantica cu mas a resalta pa Lady Ruth, tawata “O sole mio” canta pa “The one and only” Edjean Semeleer. Ela pone Lady Ruth bay “back in time” ta scucha su guapo Uncle Luis Tromp ta canta a la Mario Lanza of a la Pavaroti, cu su excelente vos,( awe cu su 81 anja di edad) algo cu ta den full famia Tromp, esta, cu tur e rumannan Tromp, yuinan di Petra y Nicolas Tromp dfm ta canta bon ! Nos ta sinti nos tambe bendiciona pa sa canta un crenchi, cu nos a tribi hasi tambe den nos dos One woman shownan cu nos a tene algun anja pasa. Principalmente mi Tia Esther Tromp ta destaca y toca nos curason ora e kanta karaokee na 4 idioma. Oh ki bunita e ta canta e cantica hulandes di Andre Haazes “Een beetje verliefd “ y hopi mas. Nos ta un famia cantado cu gusta canta y pasa bon. Bida ta dushi y tin biaha cortico. Pesey nos ta sigui duna Creador danki pa salud y amor. Danki Go Cultura Foundation pa boso bon trabaonan pa sigui promove nos cultura. Lady Ruth ta spera cu Aruba a pasa un dushi Dia di San Valentino y corda cu amor ta amor tur dia , si bo bib’e y expres’e. Danki na nos dushi hendenan den prensa pa a publica nos poemanan pa cu e Dia di amor. Stay safe, love you too !
