Pa di dos aña konsekutivo ACE Foundation lo tin su “Vacation Art School” den e fakansi di karnaval di 28 febrüari pa 4 di mart 2022 pa muchanan for di 6 aña te ku 11 aña di edat. Orario lo ta di 8 di mainta pa 12.30 di mèrdia, preis pa partisipá ta $60,- pa mucha.
Na 2021 ACE Foundation a organisá su promé “Vacation Art School” kaminda a krea un videoclip titula “Boneiru Corona Free”. Mirando ku e aña aki tampoko no tin selebrashon di karnaval, ACE Foundation a bin na e idea pa organisa un siman di tayer pa mucha entre 6 pa 11 aña di edat ku tin interes di hasi algu kreativo durante di e vakashon aki.
Durante e siman di 28 di febrüari pa 4 di mart e muchanna lo bai traha riba presentashon di baile, musika i aktuashon ku e meta pa presentá na final di siman.
E aña aki lo tin dosentenan invitá for di Kòrsou kual ta Zoë Bernardina eks bailarina di ACE Squad ku awor e ta forma parti di D’ART, un grupo di baile ku hopi aña di trayektoria na Kòrsou. Huntu kune lo tei Richailine Elisa un aktris i dosente di drama diploma, ku un trayektoria di mas ku 10 aña den e mundu di teater. Aña pasá e la disidi di krea su propio skol di aktuashon Elisa Academy na Kòrsou. Esaki ta bira e promé kolaborashon entre e dos organisashonnan aki, kual ta Elisa Academy i ACE Foundation.
Richailine a krese komo un di e mihó aktrisnan hóben na Kòrsou. Ganando “Miho Aktris-Premio Karabela” na 2007. Despues di 4 aña komo aktris, produktor i regisor na Teatro Luna Blou i La Tentashon e la disidí di studia na “De Acteerschool Rotterdam”.
Na Hulanda Richailine a sera konosí ku e mundu di arte Oropeo, diferente téknika di teater, estilo di aktuashon i tambe tour rònt Hulanda ku diferente produkshon. Durante su estudio i karera e la haña oportunidat di forma parti den produkshonnan grandi i rekonosé na
Hulanda. E la traha ku regisornan grandi manera Gerardjan Rijnders i Erik Vos.
Un invitashon ta bai na tur mayor, si bo ta interesá pa bo yu forma parti di e siman di tayer aki inskribi awe mes, luganan ta limita. “Vacation Art School” pa muchanan di 6 pa 11 aña di edat. Fecha ta 28 februari pa 5 di mart for di 8or di mainta pa 12:30 di mèrdia. Preis pa partisipashon ta $60,-.
Pa mas informashon por tuma kontakto ku Direktor Artistiko Lilimar Valencia na +5999 6658177 of por mail na acesbonaire@gmail.com
