For di djárason 16 di febrüari 2022, muchanan den e edat di 5 te ku 11 aña por pasa e angua di corona pa motibunan médiko. Entre otro ta bai pa muchanan ku ta hopi malu i ku un dòkter di mucha ta trata nan. E muchanan akí tin un chèns mas grandi pa bira hopi malu si nan kontagiá ku e vírùs di corona. Na Boneiru ta bai pa mas o ménos 40 mucha hopi malu. Nan ta promé na bùrt pa pasa e angua di corona. Pa pasa e angua di corona, mayornan òf tutornan mester duna pèrmit pa esaki.
Tin tambe un otro grupo di mucha ku pa motibu médiko por pasa e angua di corona. Ta bai pa muchanan ku regularmente tin kontakto ku hende grandi vulnerabel ku problema médiko serio. E muchanan akí tin por ehèmpel un welo òf wela di riba 80 aña ku ta biba huntu ku nan den kas. Òf e muchanan hopi biaha tin kontakto ku un persona di riba 50 aña ku un malesa di pulmon serio. Den un kaso asina, mayornan por skohe pa nan yu pasa e angua di corona pa protehá hende grandi vulnerabel. Mayornan òf tutornan mester duna pèrmit pa esaki.
Pa muchanan salú di 5 te ku 11 aña no tin motibu médiko pa pasa e angua di corona. Esaki ta konta tambe pa muchanan ku no tin kontakto regular ku hende grandi vulnerabel ku ta hopi malu. Banda di esei ta konosí ku muchanan ku a haña COVID-19 kaba, ta krea resistensia kontra e malesa akí. Mayornan òf tutornan por skohe pa e muchanan akí pasa e angua di corona aunke esaki médikamente no ta nesesario.
E dòkternan i enfermeranan ku ta pasa e muchanan angua, tin eksperensia ku trahamentu ku mucha chikitu. Nan ta tuma tempu pa trankilisá e muchanan. E muchanan ta haña e bakuna di Pfizer na un kantidat spesialmente adaptá pa nan. Solamente ku sita por pasa nan angua. Mayornan i tutornan por traha un sita pa pasa angua pa mucha via 0800 0900.
Promé ku muchanan di 5 te ku 11 aña pasa e angua di corona, mayornan òf tutornan mester yena un lista di pregunta. Si un mucha ta bebe remedi, ta importante pa mayornan/tutornan bai ku e remedinan di e mucha e sita di pasa angua na Kompleho Deportivo Jorge Nicolaas.
Si mayornan/tutornan tin un mapa ku dato médiko di e mucha, ta bon pa bai e sita ku esei tambe. E dòkter ku ta supervisá durante pasamentu di angua, ta splika mayornan/tutornan e ora ei kiko ta mihó pa e mucha. Bo tin pregunta tokante e angua di corona pa muchanan di 5 te ku 11 aña? Yama e ora ei e number grátis 0800 0900.
