Barkunan krusero ta tene nan mes bon na kondishonnan di corona di Boneiru pa laga personanan na bordo desembarká. Nan ta koperá bon ku e departamento di Salubridat Públiko i kapitan di haf, asina e dos partidonan akí ta laga sa. For di sèptèmber aña pasá, e barkunan ta bini Boneiru atrobe. For di e tempu ei, a sosodé ún biaha ku a nenga entrada na un barku. Esei tabata pasobra e kontagionan na bordo a subi, mando di e barku krusero tabatin komprenshon pa esaki.
Semper barkunan krusero mester entregá un deklarashon di salú di pasaheronan i miembronan di tripulashon ya kaba for di 72 ora promé ku yegada. En konekshon ku COVID-19, nan mester kumpli tambe ku kondishonnan di corona pa atmití nan na Boneiru. Pasaheronan di un barku krusero ta obligá pa hasi un tèst di PCR promé ku nan biahe kuminsá. Si nan tèst positivo, nan no mag bai ku e barku. Ta tèst tripulashon regularmente. Na bordo tin fasilidat pa hasi tèst di PCR i tèst antígeno pa pasahero.
Promé ku personanan na bordo yega un destinashon, ta tèst nan. Esun ku tèst positivo òf tin keho, no mag baha for di barku. Ora tin duda òf muchu kontagio, pasaheronan i tripulashon no por desembarká. Tur barku tin regla pa investigashon di fuente i kontakto den kaso di un kontagio. Barkunan tin nan propio hòspital na bordo i tambe kamber pa pasaheronan òf miembronan di tripulashon ku mester bai den karentena òf isolashon.
E departamento di Salubridat Públiko ta den kontakto estrecho ku servisionan di salubridat públiko na Aruba i Kòrsou. E islanan ta interkambiá informashon ku otro tokante salú di personanan na bordo i tambe tokante maneho i medidanan di corona. Asina e departamento ta keda na altura di e eksperensia ku barku krusero na otro isla.