For di 14 te 17 yüni 2022 nos isla ta presentá un evento pa hende ku ta gosa di bida
Ku orguyo Boneiru ta anunsiá un evento nobo pa amantenan di ròm i biahamentu: Bonaire Rum Week – Siman di Ròm Boneiru –, un selebrashon di e mundu di ròm karibense, ku kompetensia di kòktel, sena sukulento ku ròm, fiesta riba bich i chèns pa purba algun di e mihó ròmnan na mundu.
Bonaire Rum Week, ku ta planiá pa 14 te 17 di yüni 2022, ta un evento ku Tourism Corporation Bonaire (TCB) ta organisá huntu ku Caribbean Journal, e empresa karibense di medionan di komunikashon di biahe mas grandi na mundu i e tim tras di e Caribbean Rum Awards Festival anual na St. Barths.
Bonaire Rum Week a keda anunsiá riba djabièrnè 11 di febrüari 2022 den presensia di direktor di TCB Miles Mercera, diputado di turismo Hennyson Thielman, redaktor i editor Alexander Britell i hefe di redakshon Guy Britton di Caribbean Journal.
“Nos ta sumamente entusiasmá ku nos por trese un evento ‘high end’ di ròm na un di e islanan mas outéntiko i eko-aventurero ku un bunitesa natural den área karibense’, asina Alexander Britell, redaktor i editor di Caribbean Journal a bisa. ‘Boneiru ya kaba tin un esena kulinario di klase mundial i e siman akí yen di alegria ku ròm ta e manera perfekto pa pone e destinashon akí den spòtlait i his’é na un nivel mas haltu.”
Direktor Miles B M Mercera di Tourism Coporation Bonaire ku ta partner di Bonaire Rum Week a bisa: “Nos ta orguyoso ku nos por introdusí Bonaire Rum Week komo un eksperensia gastronómiko nobo i karakterístiko na nos isla. Nos no ta solamente konosí komo é paraiso pa sambuyadó na mundu, pero rònt mundu amantenan di bon kuminda ta deskubriendo i rekonosiendo nos pa nos oferta kulinario. Nos promé Bonaire Rum Week anual ta nos
invitashon na aventureronan rònt mundu pa bin eksperensiá nos kushina outéntiko, nos ròm lokal i e bida riba nos isla.”
E festival ta kuminsá ku un fiesta di apertura, siguí pa un kompetensia di kòktel pa henter nos isla na Tiki & Co, e mihó bar di kòktel riba e isla akí, ku e mihó bartèndernan di Boneiru; un lùnch ku hopi ròm; un happy hour di ròm yen di zjeitu i un eksperensia kulinario ku vários plato ku un kombinashon di ròm, siguí pa un evento kombiná di ròm i sigá.
“E evento akí ta un tremendo manera pa mustra un otro banda di Boneiru, komo un di e destinashonnan mas importante di área karibense pa tantu amantenan di bon kuminda komo amantenan di bibida stèrki”, segun Guy Britton, hefe di redakshon di Caribbean Journal.
Boneiru tin un kultura di kòktel ku ta floresé, for di ròmpùnchnan karakterístiko te serbeserianan mikro i barnan riba bich.
Nos isla ta kas tambe di e destileria Cadushy ku ta traha Ròm Rincon, e ròm hopi pidí, koroná i trahá lokalmente di Boneiru, e ròm anfitrion di e evento akí.
E partnernan di Bonaire Rum Week ta entre otro Tourism Corporation Bonaire; Caradonna Adventures; Delfins Beach Resort Bonaire; Captain Don’s Habitat; Buddy Dive Bonaire; Harbour Village Beach Club; Bellafonte Bonaire; Tiki & Co; Cadushy Distillery; JC Herrera; Bottles Bonaire; The Wine Factory Bonaire; Best Cellars i Best Brands Bonaire.
Tokante di Caribbean Journal
E portofolio di medionan di komunikashon di Caribbean Journal ta enserá e wèpsait di biahe karibense mas popular na mundu, un boletin informativo diario, un korant di real estate i invershon di promé klase i un portofolio kresiente di tantu eventonan komersial komo pa konsumidó, ku komo punto kulminante e Caribbean Rum Awards St Barths, e kompetensia di ròm mas importante den nos region.
