E aña aki Universidad di Aruba, Fundacion Lanta Papiamento, Fundacion Corector di Papiamento, Departamento di Enseñansa y Departamento di Cultura a uni pa presenta Dictado Nacional 2022. E evento lo tuma luga diasabra 19 di februari di 5 or pa 7 or na Universidad di Aruba. Despues di un par di aña lo tin atrobe un evento di dictado pa tur cu tin amor y aprecio pa Papiamento y kier skirbi e idioma bon. Por registra pa tres nivel segun edad: 12 – 15 aña, 16 – 18 aña y 19 aña p’ariba. Tanto hoben como adulto ta cordialmente bonbini pa participa na e reto di skirbi Papiamento bon durante Dictado Nacional 2022. Lo tin premio pa e ganadornan di cada nivel.
E evento aki ta entrada pa un siman di atencion pa Dia di Idioma Materno cu ta 21 di februari. Durante e siman aki mundo lo duna atencion na tur idioma materno y na Aruba nos tambe lo mustra aprecio pa nos idioma nacional Papiamento.
Pa participa inscribi via link riba FLP su pagina di Facebook: Fundacion Lanta Papiamento – FLP
