Secretario General di MEP Endy Croes a splica cu e ta completamente decepciona den partido AVP momento cu scucha e tantisimo actonan di corpucion cualnan a wordo presenta cu prueba dilanti mesa berde tanto den caso IBIS di Paul Croes y caso Avestruz di Benny Sevinger ambos ex ministernan di AVP.
Digna Lacle Herrera (def) lo ta bolter den su caha:
Segun e Secretario General, AVP a lanta Fundacion Digna Lacle Herrera esta un instituto pa prepara su hobennan cu formacion politico pa subi lista. Esaki AVP ta hacie den colaboracion cu FESCA y Fundacion Mito Croes. Tristo di tur esaki ta cu masha hopi politico cu a pasa den e formacion politico aki pa wordo prepara pa un carera politico a fracasa. Algo a bay robes y e preparacion no ta cumpli cu e meta. E curriculum a wordo cambia pa uno mafioso. No por a confirma cu esnan cu ta prepara e hobennan aki manera Henny Eman (antes) y Mike Eman ‘himself’ a proposito a haci dicho cambionan pa crea un mente maligno den e hobennan. Honor a la berdad cu AVP ta rondona cu holor stinki y hopi di candidatonan cu a ricibi training di Henny Eman y Mike Eman sea a cay cera of ta bou investigacion pisa. Digna Lacle Herrera y Mito Croes lo ta bolter den nan caha di tanto corupcionnan di AVP. Nan lo ta hopi defrauda di e metodonan politico cu ambos Fundacion ta brinda hobennan politico a traves di Henny y Mike Eman. Hobennan ta sali cu un mente asina troci y maligno pa subi lista di AVP y sigur esaki no tabata e proposito.
Ehempelnan bibo ta Paul Croes, Benny Sevinger y Richard Arends:
Ehempelnan bibo di corupcion den dia cla manera ex candidato y ex minister di AVP esta Paul Croes. Paul Croes ta condena den eerste aanleg (1) hues y den Hoge Beroep ( 3) hues na 4 aña di prison y 10 aña cu e no por fungi den ningun funcion den gobierno. Paul Croes ta bini di un bon famia y ta un hoben cu tremendo preparacion na Hulanda y tabata inspira di tin un futuro briyante. Lamentablemente su escogencia politico di tene man cu AVP y pasa den e proceso di Formacion politico di AVP unda a siña Paul e trikinan mafioso pa nan practica momento nan ta den posicion y esaki a crucifica. Nos ta lamenta esaki masha hopi pero esaki ta e realidad. Na Hulandes tin un dicho ta bisa “wie met pek omgaat wordt ermee besmet”.
Benny Sevinger:
Benny Sevinger e sospechoso principal den caso di Avestruz. Tambe un bon mucha homber deportista bon prepara kende kier a bisti e sapatonan di Watty Vos un legendario politico. Igualmente Benny a wordo forma den e Fundacionnan politiconan di AVP unda Henny Eman y Mike Eman ta duna les. Na caminda Benny tambe a siña e trikinan pa horta pueblo y enrikece su mes cu patrimonio di pueblo. Manera el a haña su chens pa bira minister di AVP el a masacra Aruba cu bendemento di tereno. Asina recientemente Ministerio Publico a presenta pruebanan con Benny tabata ricibi placa a cambio di fabornan politico riba cuenta manera Fundacion Curason Berde. Tambe a haña otro cuenta na Curaçao Golden Rain Private Foundation cu mas di 1 miyon US Dollar riba dicho cuenta cual cuenta e amigo di infancia y di cas di Benny esta Sussebeek ta maneha. Benny cu Sussebeek ta manera dos bonchi den un baliña y pues ‘best friends’. Placa di e cuenta aki tambe tabata yega riba cuenta di Benny esta Fundacion Curason Berde. Ta un structura di corupcion ‘highlevel’ di crimen organisa cual ta refleha e modus operandi di AVP. Corupcion hopi bon y profesional structura cual Ministerio Publico a logra intercepta y penetra pa decifra esaki te den fondo. Hopi tristo pa mira con AVP ta usa medionan manera Speed y Patrick pa bruha pueblo y desvia atencion pa asina AVP por a horta e pueblo aki na un manera organisa. Pero nan bingo tambe a hunga awor.
Richard Arends:
Richard ta otro hoben hopi bon prepara cu Master opleiding. Richard tambe a traha masha di cerca cu Fundacionnan cu ta prepara hobennan politico di AVP. Richard tambe a ricibi preparacion di Henny Eman y Mike Eman. Lamentablemente aki ta unda nan mente ta troce momento nan siña e arte pa gaña pueblo pinta cosnan bunita pa mientras pueblo ta kere den promesanan falso ( manera AVP lo elimina BBO) nan mes ta liber pa horta e pueblo na manera fini. Asina Richard kende a traha e programa nan di AVP a logra lanta Horizon Consultant y a traves di e compañia aki na un manera “legal” tabata cobra serca Mike Eman, Utilities, RDA. Elmar, WEB pa nombra algun. A logra ranca 4 miyon florin di pueblo y a traha un cas super luhoso na malmok den 8 aña di gobernacion di AVP. Ta pa e rasonnan aki Digna Lacle Herrera y Mito Croes lo ta bolter den nan caha ora mira e resultado di formacion di politiconan cu ta subi lista di AVP. Despues cu nan pasa les di formacion na man di Henny Eman y Mike Eman ta resulta di ta comberti un hoben studia cu talento den un bandido. Tin mas cabes pa lora manera Mike de Meza , Mike Eman mes den caso di a tuma varios suma di 50 mil Dollar for di Robertoi Rincon. Pues AVP ta un partido cu ta bolter cu holor stinki di corupcion y nunca pero nunca mas por confia AVP cu un solo voto. AVP sinonimo di corupcion!
