Pa lunas caba algun sindicatonan cu algun miembro cual cu no ta mayoria ta haci tur posibel pa maniobra situacion di 12.6% , sinembargo e berdad ta si no a kita e 12.6% tur hende lo mester a bay cas! Awor kico ta mas responsabel pa a haci ?
For di seno di Gobierno por a compronde cu no sa kico mas pa splica sindicatonan y nan miembronan cu e 12.6% di recorte cu a bini cu ne tabata algo necesario. Aruba no tin entrada y ta depende desde e pandemia totalmente di Hulanda.
Aruba su entradanan a baha drasticamente durante e pandemia, turistanan no tabata yega manera antes, no tin inversion y cu un debe grandi ainda. E unico porta habri e momento ey tabata Hulanda. Pa haya prestamonan asina grandi y sigui haya ayudo, e miho opcion tabata madre patria, cu cual tin un relacion constitucional caba.
Ningun otro caminda Aruba lo a haya e ayudo asina rapido. Hulanda a bisa Aruba cu palabra cla: Baha bo gastonan riba presupuesto. Y e sugerencia di Hulanda mes tabata: kita hende di trabou. Esaki pa Gobierno tabata un decision demasiado drastico. Asina a yega na e acuerdo pa haci e recorte di 12.6%.
E gasto mas halto di Gobierno ta salario y beneficio di ambtenaarnan. Si e meta ta pa mantene nan na trabou, e miho opcion ta pa laga nan entrega te ora cu e situacion mehora. Gobierno no por bay mishi cu salario den sector priva, pasobra esey no ta cay bou di nan presupuesto. Esun di ambtenaarnan si y pa nan mantene nan trabou mester di e cooperacion pa baha e entrada di nan cu 12.6%.
Ya caba Aruba tabata den un situacion unda a bin ta recordando nan gastonan pa por cumpli cu e debenan grandi haci den pasado cu e gobierno actual aki no a haci. E problema ta gastonan di Gobierno y cu e pandemia esaki a causa cu e debenan di Aruba a subi atrobe, apesar di tur e logronan despues di 2017 bin ariba. Ora cu e pandemia a dal, Aruba a cay den un situacion hopi dificil unda cu e promenan cu mester a yama pa entrega y coopera cu e situacion ta e cuerpo di ambtenaar.
Gobierno ta bisa di ta consciente cu e ta un sacrificio grandi y pesey mes nan a bin ta negociando cu Hulanda riba e forma pa baha un poco loke ta exigi pa Aruba baha di su gastonan. A calcula cu mester baha esaki cu 12.6% pero e situacion ta dificil y ta negociando cu Hulanda pa un tempo caba cu e suma di gasto cu kier pa baha lo wordo reduci na loke ta similar na un recorte di 6%. E positivismo y speransa mester por keda pa Aruba por recupera y por cuminsa baha e 12.6%. No puntra solamente kico pais Aruba por haci pa bo , pero puntra abo como ambtenaar kico abo por haci pa bo pais por haya e forsa pa bay dilanti y cu por kita e 12.6% mas lihe cu ta posibel.
E fuentenan ta bisa cu no mester lubida cu e gastonan cu mester baha ta for di seno di Gobierno y salario di ambtenaarnan ta e gasto mas grandi di Gobierno. No por pidi sector priva coopera pasobra nan no ta forma parti di e gastonan di Gobierno. A manda proposicion aden y den e reunion di Conseho di Minister di Reino siman pasa diabierna no a bay di acuerdo cu e proposicion. Gobierno sinembargo no ta entrega y ta sigui den contacto continuo cu Hulanda pa yega na un miho formula riba nan demanda pa baha e gastonan.
Ta importante pa Aruba uni na e momentonan aki , gobierno ta haci su parti di negosha y trata di baha y of kita e 12.6% pero abo como ambtenaar kico bo por haci pa Aruba cuminsa drei bek manera nos tur conoce ? , siguramente cu tur e protestanan y precion pa dianan liber y tuma un postura di exigencia bruha tera Aruba no lo yega yun caminda. Awor mas cu nunca Aruba nos cu ta stima e pida baranca aki mester uni y hunto pusha pa hiba Aruba bek na unda nos tur ta bon. Sacrificio ta di nos tur!