Tabata i por lo pronto ta keda prohibí pa trese karni i produkto di karni manera wòrst, chorizo i salami for di Repúblika Dominikana i su pais bisiña Haiti pa Boneiru. A deskubrí e pèst di porko afrikano ku ta sumamente kontagioso na Repúblika Dominikana. Pa e motibu akí for di 2021 un prohibishon di importashon ta vigente pa tur produkto for di Repúblika Dominikana i Haiti pa protehá e porkonan na Boneiru.
Departamento Veterinario di Boneiru i duana ku severamente ta supervisá e prohibishon, ku regularidat ta konfiská produkto di karni for di Repúblika Dominikana. Den luna di desèmber 2021 nan a tuma muestra di algun wòrst konfiská i a manda nan Hulanda pa kontròl. Den un di e muestranan nan a haña pèst di porko afrikano. Esaki ta nifiká ku entrada di pèst di porko afrikano ketu bai ta un menasa real pa Boneiru. Pa e motibu akí importashon di karni i produkto di karni for di Repúblika Dominikana i Haiti por lo pronto no ta posibel.
Pèst di porko afrikano ta sumamente kontagioso i dañino pa porko. Kontagio por tuma lugá pa medio di kontakto direkto entre porko òf pa medio di kome karni òf produkto di karni kontagiá, pero tambe via opheto kontaminá manera sapatu, paña di bisti, vehíkulo i kuchú òf kuminda di bestia kontaminá. Pèst di porko afrikano no ta kontagioso pa hende i no tin konsekuensia pa siguridat di alimento.
Outoridatnan lokal na Boneiru ta sigui monitoriá e situashon i nan ta tuma e pasonan nesesario pa protehá e porkonan riba nos isla.
