Dialuna 7 di februari 2022, Gemeenschappelijk Hof van Justitie di Aruba, Corsou y Sint-Maarten y e islanan BES, lo conoce loke lo pasa den historia pa un di e casonan di mas escandaloso di corupcion di historia di Aruba.
Ex-minister di infrastructura miho conoci como Benny Sievinger, ta wordo acusa di a comete entre otro; soborno di ambtenaar, falsificacion, estafa, labamento di placa, abuso di funccion como minister y malversacion di fondonan publico.
Den corte lo mester bay demostra loke tur hende sa cu tawata tuma luga.
Cualkier ciudadano naci na Aruba cu a crece cu e soňo pa un dia haňa un pida tereno y construi nan hogar, tawata mester a inscribi nan mes na DIP pa por a bay riba un lista di espera pa asina cumpli cu e soňo aki.
Michella Steenvoorde – Laclé di Partido MEP ta comparti su experiencia di con e y hopi otro hoben a wordo stroba di haya un tereno pa construi nan cas mientras cu Benny Sevinger a regla hopi tereno pa hopi den su ‘inner circle’ y pa su beneficio economico personal.
“Mi mes persona prome cu mi a subi e avion pa bay studia na Hulanda na aňa 1998 hunto cu tur otro beursalenan, tawata wordo conseha pa pone nos nomber na DIP pa asina ora nos caba di studia, nos lo yega na beurt pa haňa un tereno. Hopi di nos a bay para den e rei ey, a paga e inschrijfgeld pa nos sigura cu ora nos yega back cu nos diploma den man nos lo por construi nos futuro. Ya caba e tempo ey tawata tin un lista di espera, no pasobra no tawata tin tereno, sino pasobra e bureacracia tawata Asina horribel.
Cu mi diploma(nan) y experiencianan laboral den man na aňa 2015, mi tawata cla pa cuminsa construi e soňo ey. Manera hopi otro beursalen manera ami, mi a topa cu un shock, cu nan a saca mi nomber for di e lista di espera, y mi tambe a wordo conseha cu unico persona cu por logra pa mi yega na un tereno ta Minister Benny Sievinger, mi tambe a haňa un “gaarne uw medewerking”, pero den mi caso cu no ta un comerciante, e tawata un promesa en vano.
Den todo caso mi a logra haňa mi aňanan di espera back, y mi nomber a wordo poni atrobe riba e “wachtlijst”. Cual tawata mi derecho y e derecho di tur e beursalen manera ami cu a para den e rei ey prome cu nan a subi nan avion. Pero tiki di nan a logra haňa e tereno pa nan construi nan soňo, pa esey nan mester tawata den e “inner circle” of aparentemente sa ken pa “soborna”!
Bo por imagina bo cu na 2018 ora Gabinete Wever-Croes-I a cuminsa e proceso di automatisa y sistematisa e pidimento di tereno, tawata tin peticionnan di terenonan desde aňa 1990 cu nunca a haňa un contesta?
No solamente bo a trapa riba derecho di bo ciudadanonan, pero ba caba cu nan soňonan. Ba pone un “prijskaartje” na nan soňonan.
Mi perona y mi ta imagina hopi profesionalnan young, cu diploma y experiencia laboral den man a laga e soňo di construi un cas bay y a simplemente cumpra un cas existente.
Pero maňan den corte nos lo bay scucha kendenan sί a haňa tereno, cuanto m2 y/of hectares di tereno nan a haňa, con e procesonan aki tawata wordo regla den cuestion di dias y por ultimo ta cuanto fondo esaki tawata genera pa e politico y su entorno.
Mientras anos, e ciudadano humilde mester a warda aňanan y tin ainda ta wardando riba e soňo di construi nan cas”.
