Despues di a deliberá riba posibilidatnan ku ta eksistí, Sekshon di Kultura, Arte i Literatura, SKAL, a kumbiní ku lo enkargá Fundashon KLAVE ku dos evento karnavalesko.
E aña aki mirando desaroyonan rondó di kombatimentu di pandemia COVID-19 i su reglanan vigente no ta posibel pa selebrá Karnaval riba nos isla.
Pa evitá ku e temporada ta bolbe pasa sin ku por organisá nada pa motibunan ya konosí, SKAL den konsulta ku Fundashon KLAVE, Sekshon di Mantenshon di òrdu i tim di EBT di entidat públiko Boneiru a deliberá pa check ki evento si por organisá virtualmente, sin presensia di públiko.
E aña aki ta eksistí e posibilidat ku durante e periodo karnavalesko Fundashon KLAVE lo por organisá dos evento virtual.
E promé evento ta un kompetensia di disfras ku ta tuma lugá dia 19 di febrüari i e di dos evento ta dia 26 di febrüari kaminda lo tin un show di tumba Boneriano kombiná ku Roadfire.
Tur dos eventonan karnavalesko en kestion mester tuma lugá konforme reglanan vigente di COVID-19, sin presensia di públiko.
SKAL i entidat públiko Boneiru ta pidi komunidat Boneriano pa reservá dia 19 i 26 febrüari próksimo pa mira e dos eventonan karnavalesko virtualmente mediante medionan sosial.
