Desde cu su persona a asumi e cargo como Minister di Cultura, hunto cu Comision Celebracion Dianan Nacional a hiba un maneho pa percura pa materialnan educativo y ilustrativo yega na nos muchanan di scol pa asina nan ta bon educa riba nos historia, nos celebracionnan nacional y tradicional. Pa e celebracion Dia di Betico 2021 tur mucha di scol a ricibi un caarchi di Betico cu informacion di Betico, cada caarchi tabata tin un number y cu esaki nan a participa pa gana un premio, como tambe tabata tin un competencia pa traha un opstel di Betico. E situacion y desaroyonan rond di Covid19 a haci cu no por a bini hunto prome pa por a entrega e premionan, a informa e ganadornan cu asina cu e situacion ta mas controlabel y tin un bon ocasion lo entrega esakinan. E momento a yega y a logra haya tur e ganadornan pa hunto presenta na bestuurskantoor y asina por ricibi nan respectivo premio. Minister di Cultura Sra. Xiomara Maduro a gradici tur e participantenan y a felicitanan pa nan participacion den competencia Dia di Betico 2021.
Ganadornan Carchi di Betico prome tanda a resulta promer premio #3761 pa e hobencita Elisa Solognier di Scol Basico Washington kende a gana un tablet. E segundo premio #8912 a resulta e hobencita G’nayla Krozendijk di Scol Primario Kudawecha kende a gana un cadeaubon pa articulonan escolar. Pa duna mas oportunidad pa mas muchanan participa y gana premio, a organisa un segunda tanda y e prome premio a resulta #0881 pa e hoben Wilson Cao di Colegio Felipe B. Tromp kende a gana un tablet.
Un cuerpo di hurado a evalua tur e opstelnan y e ganadornan di premio di opstel di Betico pa categoria 7 pa 8 aña a resulta e hobencita Rovanne G. Tjon di 7 aña kende ta alumno di Colegio Sagrado Curazon. Den categoria 9 pa 10 aña a wordo gana pa e hobencito Randall Trimon di 10 aña kende ta alumno di Colegio Ora Abou. Pa e categoria 11 pa 12 aña a wordo gana pa e hoben Elias Luzardo di 12 aña di Scol Duna Un Man.
Minister Xiomara Maduro a entrega premio na tur e ganadornan y a gradicinan pa nan participacion. E ganadornan a keda masha contento cu nan premio.
