Pa promé biaha Frakshon Coffie (FC) ta bin ku un relato di aña kompleto. Un primisia ta publikashon di un relato finansiero pa e aña kompleto ku Frakshon Coffie ta den Konseho Insular. Na 1 di òktober 2020 Frakshon Coffie a kuminsá den Konseho Insular. Pa e promé tres lunanan esta òktober 2020 te ku desèmber 2020 tambe Frakshon Coffie a traha un relato finansiero pero esaki a bai pa grefir so.
E aña akí ku Frakshon Coffie ta kubri un aña kompletu esta 2021 nos kier a publiká un relato finansiero kaminda por mira na kiko Frakshon Coffie a usa su fondonan. Pa duna un mihó bista i splikashon di uso di e fondonan nos ke duna un splikashon di e trabounan ku ta keda kubrí den e relato. E trabounan ta:
- Trabounan Atministrativo
- Trabounan di Skirbi i Tradusí
- Trabounan di Konseho
- Trabounan di Medionan Sosial
- Kompensashon di gastunan
Bou di Trabounan Atministrativo ta kai: Atendé ku agènda di Frakshon, atendé ku sitanan, tantu esun ku ke traha sita ku FC òf sita ku FC ta traha ku otronan, atendé yamada di telefòn, atendé sita ku prensa, atendé fakturanan ku ta drenta i sòru pa paga nan. Mantené korespondensia ku drenta i salí, trabou di fail tur dokumento di manera ku por haña esakinan bèk. Trabou di fail elektróniko di tur e-mail ku drenta. Prepará dokumentu pa reunion.
E trabou di skirbi i tradusí tin di aber ku skirbi, yuda skirbi òf koregí e idioma di disertashonnan, kartanan i komunikadonan. E trabou di tradusí ta enserá tradukshon di disertashon, karta òf komunikado pa prensa.
E trabou di konseho ta enserá lesa dokumentunan ku drenta i wak nan importansia i kiko mester hasi ku nan i hasi lo nesesario. Lesa dokumentu relevante na un tópiko, i prepará e tópiko pa sea reunion òf un karta òf un komunikado. Lesa i prepará dokumentu pa reunion, yuda prepará pa reunion, yuda prepará disertashon, karta i komunikado. Hasi sondeo pa wak kiko ta biba den nos komunidat pa wak kon pa atendé ku esakinan. Identifiká tópikonan al kaso, duna konseho riba tópikonan al kaso i prepará pa atendé esakinan via karta òf den reunion. Duna sosten ku p.e. skirbi un karta òf duna konseho ki kaminda pa kana, na públiko ku bin serka FC pa ayudo.
E trabounan di Medionan Sosial tin di aber ku prepará i publiká trabounan di FC riba Medionan Sosial inkluso kompaña esakinan ku potrèt òf otro material.
Kompensashon di gastunan tin di aber ku prinsipalmente gastunan ku terseronan ku ta duna e servisionan ariba menshoná por tin i ta fakturá esakinan.
Loke nos ta mira aki ta servisionan ku terseronan ta duna na FC. Pa tur e trabounan ku nos por mira ku Konsehal Coffie ta desplegá, inkluso tur e reunionnan ku e ta partisipá na dje, Konsehal Coffie mes ta risibí un rekompensa separá di $ 807,67 pa luna.
Pa duna un idea di e aktividatnan ku Frakshon Coffie i Konsehal Coffie ta desplegá nos ta duna un kompilashon di esakinan den e siguiente tabèl.
Ku presentashon di e sifranan akí FC ke duna transparensia kon nos ta atendé ku fondonan di pueblo. Nos pueblo por mira na unda e fondonan a bai i por husga funshonamentu di FC/Konsehal Coffie komo representante di pueblo.
FC t’ei pa representá pueblo i p’esei semper nos ta habrí pa pregunta, idea i sugerensia pa nos por hasi nos trabou mas mihó.