Contrario na loke un minister a declara diahuebs ultimo cu presupuestol 2022 ta na parlamento, miembro di fraccion di AVP, Gerlien Croes ta mustra cu esaki no ta e caso ya cu ainda e concepto di presupuesto 2022, no a yega Parlamento pa asina por manda haci pregunta riba esaki.
“Loke si Parlamento a ricibi den man na december 2021, ta e ‘advies’ di CFT riba locual ta e presupuesto 2022, despues di gobierno di Aruba a manda e presupuesto pa CFTpor duna su conseho riba locual gobierno ta propone pa bay gasta den 2022.
Ta hopi preocupante ora cu nos tuma nota cu e conseho di CFT basa riba e presupuesto cu nan a bay trece pa Palamento di Aruba, ya nos tin indicacion di kico ta bay spera nos, principalmente ora cu nos tuma nota cu CFT ta keda menciona cu gobierno di Aruba tin cu realisa su mes, cu e no por keda hisa su gastonan operacional.
CFT ta mustra den su conseho di luna di November ultimo, cu gobierno tin presupuesta 43 miyon florin compara cu presupuesto 2020. Pues 43 miyon total di locual ta gastonan extra cu nan tin mester pa gastonan operacional di gobierno den ultimo 2 añanan.
Biaha pasa di 2020 pa 2021 nan a pidi 16 miyon extra y awor ta pidi 27 miyon extra, pues un total di den dos aña di tempo, gobierno ta gastando 43 miyon extra na goederen en diensten y ora ta lanta e pregunta, na kiko e placa aki ta bayendo?
Gobierno ta bezig ta huur edificio? Ta bezig ta sigu duna trabou? Awendia tin otro forma pa duna hendenan trabou den gobierno, caminda ta laga e hendenan aki lanta nan propio compania y ta paga pa nan servisionan, pues tipo di consultancy. Ta sumamente preocupante, ta con gobierno ta corta cerca su trahadonan den sector publico, ta bisa sindicatonan cu bo ta haci e peticion pa duna trahadonan 50% bek di loke nan a entrega, cu ta alrededor di 18 miyon, pues gobierno ta bay pidi CFT 18 miyon pa entrega bek na e trahadonan pero den mesun rosea gobierno ta bira pidi 43 miyon pa gasta extra pa gastonan operacional den ultimo 2 aña.
Pues CFT no ta bay tin un splicacion, no ta bay tin un base pa bisa gobierno cu nan ta compronde y lo wak kico lo por haci y negocia pa duna e 50% bek, pasobra gobierno tur aña ta gastando mas hopi placa. Ademas nos tin cu menciona cu mas y mas medida ta bin, entre otro por ehempel medidanan anuncia di AZV cu ta wordo introduci aworaki, caminda tur hende tin cu bay paga pa servicio, nan tin cu paga pa nan recetanan di remedi como algun ehempel.
E presentacion di medidanan pa cu AZV a laga hopi preocupacion. Tur aña gobierno ta duna AZV un suma cu ta e asina yama ‘Landsbijdrage’ pero cu pa e aña aki e ta poni na cero y si encaso gobierno bin cu e medidanan mes manera a presenta, AZV toch lo mester di 11 miyon florin ainda como ‘landsbijdrage’ pero caminda na e momentonan aki ta wordo bisa cu lo no tin Landsbijdrage.
E ora ta lanta e pregunta con por ta posibel cu gobierno ta gasta tanto miyon extra pero ta sigui corta den cartera di comunidad y na mes momento ta sigui introduci mas medida.
Ta un situacion hopi preocupante y relaciona cu e desaroyonan aki mi persona dirigi varios pregunta diahuebs na Minister Presidente kende ta esun encarga cu entre otro loke ta e parti di Arubahuis, ya cu ta momento cu tin cu cuminsa haci preguntanan specifico na unda e placa di gobierno ta bayendo.
Entre otro fraccion di AVP a pidi Prome Minister confirmacion si ta berdad cu gobierno di Aruba ta pagando cuater cas na Hulanda, pa e waarnemend directeur, pa representante di Aruba na Union Europeo, cu tambe ta e Minister Plenipotenciario suplente, un cas pa e Minister Plenipotenciario y tin un cas cu ta di gobierno mes, esta un ‘ambtswoning’ cu aparentemente ningun hende kier haci uso di dje, ya cu nan mes tabatin nan exigencianan.
Pues pueblo ta paga, pueblo ta sufri y gobierno ta sigui gasta placa bay y ta algo no solamente inaceptabel pero hopi preocupante tambe y comunidad mester sa locual ta pasando,” Parlamentario Gerlien Croes a declara.