A yega tempo pa nos tur uni y pidi Dios, pa saca Envidia for di nos cas, Famia, organisacion, negoshi,y mas cu tur cos for di nos curazon, pasobra envidia ta desastroso, pa henter nos comunidad.
Envidia ta blokia comunicacion cu Dios, ta rechasa locual ta non y ta stroba union.
Beibel ta splika nos bon cla cu rey Saul a haci 12 atentado contra bida di David sin cu David a hacie nada, solamente e tabata envidia y odia David pa su logronan.
Hopi biaha hende por envidia otro sin ningun motibo, pasobra envidia ta bini door di influencia di mal Spirito, y si bo ta hiba un bida sin Dios, of bo conoce Dios pero bo no tin temor di Dios , bo por wordo influencia .
Rey Saul tabata conoce Dios pero e no tabatin temor di Dios.
Den 1 Samuel capitulo 18 vers 11 Saul a tira lansa riba David y David a scapa for di su presencia dos biaha.
Den 1 Samuel 18:13 Saul ta haci David comandante di mil pa kita David for di su presencia , y asina mande den gera.
1 Samuel 18 vers 17 Saul ta entrega David su yiu muher Merab pa David bay bringa contra e filisteonan, pa asina hende no bisa cu ta Saul a mata David , pero ta e filisteonan a mate.
1 Samuel 18:20 Saul a duna David Mical su yiu muher pa esey bira un trampa pe y pa lanta man di filisteonan contra dje.
1 Samuel 19 :1 Saul ta bisa su yiu Jonathan y tur su sirbidonan pa mata David.
Pa bo sa mas lesa capitulo 1 Samuel capitulo 18 -19-20-21 completo.
Pero den tur esaki por wordo constata cu David nunca a ofende Saul den nada pero su logro matando Goliat y pueblo cu tabata David tabata e motibo primordial pa Saul envidia David.
Envidia no ta amigo di ningun hende, envidia ta causante di hopi dolor den famia, y ta e piedra di trompica cu ta stroba hende den nan crecemento social y tambe spiritual.
David su Curazon tabata pega na Dios , e tabata depende di Dios, David a derota Goliath den nomber di Señor di ehercitonan . David tabata tin un bida den consulta cu Dios. Mientras cu Saul tabata desobediente na Dios.
Maske cuanto Saul a persigi David , David den obedencia na Señor a bisa cu e no ta mishi cu e ungi di Señor aunke e a haña oportunidad pa hacie.
Saul su hechonan di desobedencia, y bruheria a pone Dios aparta for di dje, y e tabata tin un curazon , cu no kier arepenti.
Aunke Saul a haña oportunidad pa arepenti, toch e a sigi biba den maldad y tabata sigi persigi David pa motibo di envidia.
Nos conoce hopi tipo di envidia, Personal,, Spiritual , Deportivo,Politico , Negoshi, Enseñansa, Posicion den trabao, pero tur esaki ta perdemento di tempo, pasobra ora Dios bendiciona un persona, ni maske kico bo haci, bo no por kita for di dje, locual Dios a dune.
Y awor mas cu nunca como mayor nos mester splica nos yuinan e peliger di envidia, pasobra hopi pelea, maldad y hasta crimen ta tuma lugar pa motibo di jaloersheid y envidia.
Jaloersheid y Envidia ta haci daño na nos mes y nos famia, y lo destrui nos alma ( lesa final di rey Saul den 1 samuel 31 ver s 4+5).
Cu Dios yuda nos pa vence envidia y jaloers den nos curazon y nos bida.