Riba djaluna 17 di yanüari 2022 Tourism Corporation Bonaire (TCB) a ranka sali ku e Siman di Merkadeo Virtual i presentashon di e Plan di Merkadeo i Akshon 2022 komo parti di nos Plan di Rekuperashon pa Turismo.
E strategia pa turismo di Boneiru, bou di guia di TCB den koperashon ku su stakeholdernan, a anunsiá kuater (4) meta prinsipal pa 2022:
- Inklushon den komunidat: amplia e bentahanan ku ta surgi for di desaroyo di turismo pa un segmento mas amplio di Boneiru su poblashon.
- Turismo di balor haltu ku impakto mínimo: redefiní Boneiru komo un destinashon úniko di kalidat haltu, prinsipalmente pasobra mundu ta buskando maneranan pa hui for di e strès di COVID.
- Un strategia regenerativo koherente: trese esaki den práktika pa atraé e tipo korekto di turista i pa oumentá entrada i rentabilidat. Enfoká riba e kliente aktivo i próspero ku ke eksperensiá un produkto outéntiko. E meta ta pa laga un mihó Boneiru atras.
- Elevá e eksperensia turístiko: pone énfasis riba kultura, arte kulinario i e variedat di aventura riba tera i den laman na Boneiru. Inklushon mehorá i plamamentu di aktividat i gastu den e kadena di suministro i maneho di grupo di hende (crowd management).
E presentashon virtual tabata na enkargo di e direktor di TCB, Miles B M Mercera, kaminda el a kompartí e último desaroyonan di nos turismo, inkluso un resúmen di 2021 i resultado di e prestashonnan. Den e di tres kuartal di 2021 e kantidat di bishitante ku ta yega ku avion a bira kasi tres biaha mas tantu kompará ku e mesun temporada di e aña anterior. Mas òf ménos 38 mil bishitante a bini Boneiru ku avion. En total Boneiru a hala mas ku 2,5 biaha mas tantu bishitante ku un aña anterior. For di e datonan ta resultá tambe ku e kantidat di bishitante hulandes oropeo pa Boneiru a oumentá.
Mas aleu TCB a duna atenshon na e rendimento i prestashonnan aktual di e komunikashonnan aéreo i e metanan ku a deliñá pa aña 2022 / 2023. E Komishon pa Desaroyo di Ruta di Boneiru bou di guia di TCB, ku ta konsistí di tantu partnernan públiko komo privá, a determiná su enfoke pa e aña akí. E metanan riba término kòrtiku ta enserá ampliashon di kapasidat di komunikashon aéreo di e merkado norte-amerikano ku un enfoke stratégiko riba e área di tres estado (New York, New Jersey i Connecticut), North Carolina i Midwest USA. Tambe a duna aktualisashon tokante e kompanianan di aviashon i e progreso ku a logra.
E aspektonan mas destaká di e strategia general ta entre otro indikadónan klarito di rendimentu (KPI’s) pa tantu merkado norte-amerikano komo oropeo ku un enfoke riba oumento di nos tarifa promedio pa dia (di hotèl) i e promedio di loke kada bishitante ta gasta.
TCB lo hasi su entrada tambe den e époka digital pa medio di adoptá un strategia 100% digital pa loke ta trata su nesesidatnan di ‘branding’ i publisidat. E initiativa nobo di ‘branding’ titulá ‘Reposishonamentu di Boneiru den harmonia ku naturalesa i nos hendenan’ ta planiá pa lansa den e di dos kuartal di 2022 i ta enserá un transformashon kompleto di e wèpsait di Boneiru.
Kolekshon di dato ta keda un parti importante di henter e strategia, di kua nos ‘Bonaire Exit survey’ i e plataforma di impuesto pa bishitante lo ta di máksimo importansia. TCB a duna informashon tambe tokante su esfuersonan riba tereno di desaroyo di produkto, manera programanan edukashonal na nos skolnan, kampañanan general di konsientisashon pa turismo, proyekto di WIFI pa Boneiru den espasionan públiko i hopi mas.
Veroesjka de Windt, direktor di BONHATA, a hasi e di dos parti di e presentashon. Veroesjka a duna un bista general di e prestashonnan di akomodashon durante aña 2021 i tambe nan próksimo proyektonan pa aña 2022.
E siman di merkadeo ta sigui riba djamars ku un presentashon di e ofisina kreativo nobo Dunn & Co, ku TCB a traha huntu kuné durante e último lunanan i riba djárason tin un presentashon tokante e Exit Survey i Datonan Krusero. Tambe Miles Mercera a entrega un kopia di e Plan di Merkadeo na nos Diputado Hennyson Thielman. Pa registrá bo mes òf pa mas informashon, por fabor manda un email na marketing@tourismbonaire.com
