Sinceridad ta nifica, berdad, simpel, honesto, sin orguyo, sin arogancia, acepta bo fout, pordona otro,recconcilia cu otro, papia berdad cu otro, no sconde ningun carta den manga di camisa, sea mas abierto posibel, esey ta sinceridad.
Un hende sincero ta un hende pacifico, e no ta wak solamente su banda, pero e ta wak tur banda, y kier duna un man pa drecha cos tur caminda, pasobra e sinceridad cu ta biba den dje ta trece paz.
Hende sincero ta hende di Fe, hende cu ta stima Dios, pasobra e naturaleza di Dios ta sinceridad, Dios nunca a gaña, ni tampoco e a bisa algo y despues Dios no a cumpli, alcontrario sinceridad ta cuminsa serca Dios, pasobra Dios ta Fuente di tur berdad.
Ora nos como mayor ta presenta un peticion dilanti di Dios, na prome lugar Dios kier mira sinceridad, pasobra serca Dios ningun hende no tin bida priva, pasobra ora nos no ta sincero nos no ta mira salida, nos oracion ta keda sin contesta te na e momento cu nos presenta cu sinceridad y arepenti y papia berdad cu Dios, y ora Dios mira sinceridad Dios su man ta move.
Mayornan mester compronde cu como cabes di cas estableci pa Dios ( especialmente e tata) e sinceridad cu Dios ta exigi di nos, pa asina su luz keda briya riba nos famia.
Kiermen ta nos mes ta dicidi, sea nos ta sincero cu Dios , of nos kier tardansa den nos bida, pasobra Beibel ta siña nos cu tur hende cu aserca Dios cu u curazon sincero a wordo yuda . Dios ta stima sinceridad.
MAYOR SEA SINCERO CU BO YIUNAN.
Salomon tabata sincero cu Dios y Dios a bendicione cu sabiduria.( 2 Cronicanan capitulo 1 vers 8 -13)
Hairo tabata sincero cu Hesus y su yiu a wordo sana.( Marco Capitulo 5 vers 22-24)
Pedro tabata sincero cu Hesus y ricibi un gran Ministerio. (Juan Capitulo 21 vers 15-17).
E muher adultera tabata sincero cu Hesus y a ricibi pordon di su pica.
Zakeo tabata sincero cu Hesus y a ricibi salbacion ( Lucas capitulo 19 vers 8+ 9)
E Yui perdi tabata sincero cu su mes y a ricbi pordon di su tata ( Lucas capitulo 15 vers 17-20)
Nos mester mustra hopi prueba di sinceridad, pasobra pa falta di sinceridad, hopi famia ta kibra, hopi mucha cu necesidad di un tata un mama, hopi hende cu stress of problema mental.Cuanto matrimonio no a wordo desbarata pa falta di sinceridad.
Ta bo sinceridad ta hiba bo den presencia di Dios.
Ora nos ta sirbi Dios, si nos no ta sincero, nos no ta mira crecemento, pasobra huntu cu bo conocemento , mester bini cumplimento cu Dios, y esaki no ta asunto di placa, Dios kier pa bo mantene orden den su cas.
Den tur cos nos mester wak pa nos ta sincero cu Dios, prome cu nos murmura, critica, acusa otronan, nos tin di wak nos mes y haci e pregunta si nos ta sincero cu Dios.
Hebreonan Capitulo 10 vers 22 ta bisa : Laga nos hala serca cu un curazon sincero yen di siguransa di Fe cu nos curazon purifica di un mal consenshi, y nos curpanan laba cu awa puro.
Laga nos trece sinceridad bek den cas.