Deporte engeneral a haya e impacto di COVID hopi fuerte,Earnie Panneflek presidente di ASV River plate Futbol Club ta duna di conoce cu ya caba prome cu COVID River Plate tabatin su retonan, un di nan sigur ta e luz cu ultimamente a kibra y a dal abao.
Mirando cu esey a sosode River Plate a tuma e decision di baha tur e luznan y esey a pone cu un tempo River Plate riba su mes no tabatin mucho actividad na e compleho deportivo. Tur esaki a pone cu na momento cu mester train mester a huur diferente luga pa e muchanan por sigui train.
Tambe e actividadnan cu normalmente ta haci riba e veld esaki tur mester a keda cancela y a pone tambe cu finansieramente River Plate a bay atras. Sinembargo no a perde speransa y cu danki na AVB hunto cu otro sponsornan a logra pa River Plate haya e luznan back y asina como organisacion por a sigui loke ta e parti futbolistico.
Loke cu tambe ta un realidad ta cu COVID tambe a haci su impacto den e parti di organisacion. River Plate ta conoci cu ta organisa diferente actividadnan pa recauda fondo pa haci e deporte di futbol mas accesibel pa e bario y e muchanan, pero debi di e situacion di COVID hopi di e actividadnan no por a tuma luga y a pone cu e club a bay finansieramente hopi atras.
Banda di tur esaki River Plate ta contento cu e sponsornan cu a keda cu nan y ta aprecia e sponsornan nobo cu ta mira potencial den River Plate y cu a yuda tambe. Un di e sponsornan cu semper a kere den River Plate ta Sprite di Tropical Bottling Company y nos ta hopi agradecido na nan, Earnie Panneflek ta duna di conoce.
Deporte di Futbol a sufri hopi den e temporada di COVID y debi cu e ta un deporte den aire liber , pero cu hopi fanatico ta bini hunto, pa e motibo aki hopi biaha e ta keda para of e campeonato no por a sigui. Sinembargo a trata di sigui cu locual cu tabata por y na momento di training mantene e reglanan di DVG.
E proceso di e reglanan nobo debi di e COVID a cana bon y e mayornan tambe a coopera y debi di e esaki por a sigui cu e training nan regular por a sigui durante dia, despues cu a haya luz back e training nan por a sigui parti di anochi tambe. Presidente di ASV River plate Earnie Panneflek ta duna di conoce cu 2021 tabata un aña cu hopi reto pero a haci tur esfuerso posibel cu a keda cu cabes riba awa.
Sinembargo e retonan pa 2022 ta sigui River Plate ta conta cu muchanan di 5 aña te cu e division di mas grandi cu actualmente ta sali di division uno pa division di honor na e momentonan aki. Banda di esaki tambe River Plate tin un division di damas y veterano tambe.
Presidente di ASV River plate Earnie Panneflek ta contento mirando cu debi cu e luznan ta back y si COVID no stroba, e aña cu ta bin e meta ta pa cuminsa cana cu tur e proyectonan cu tin na mente pa sigui saca e club padilanti.
Na final di tur cos e moto tras di e bestuur actual di River Plate ta pa e bario di madiki y playa pabao haci uzo mas di e facilidadnan cu nan tin debi cu River Plate ta di e muchanan di bario. E stadion actual di River Plate ta un di e miho stadionnan cu tin na Aruba y e bario mester por haci mas uzo di dje. Pa cera e aña positivo Presidente di ASV River Plate Earnie Panneflek ta gradici tur e mayornan, hungadornan , bestuur y e sponsernan cu a keda kere den nan como club. Alabes ta haci un yamada na e pueblo engeneral di madiki y playapabao pa e aña cu a bin pa apoya nan club di bario y ta presente na e campeonatonan pa apoya nos hobennan. Tambe River Plate tin un parti cu si kier haci un fiesta por huur esaki unda cu e mes un placa lo wordo uza pa e mes un muchanan back