Directiva di organisacion Women empOwering Women (WOW) Aruba ta consisti di hende muhe determina y inspira pa empodera otro hende muhe. Desde 2017 organisacion WOW Aruba a bin ta brinda su miembronan e oportunidad pa desaroya y mehora nan habilidad personal, social y profesional.
Durante 2021 WOW Aruba a organisa diferente actividad pa su miembronan ofreciendo e oportunidad pa siña y crece a traves di reunionnan educativo, social, proyectonan boluntario y caricativo cu e meta pa pone luz riba empoderamento di hende muhenan den nos comunidad.
E reunionnan educativo cu WOW a sa di realisa durante 2021 ta entre otro Realigning & Reigniting, Emotional Intelligence, Bulletproof Self-Steem, Landspakket di pais Aruba, debate politico ‘Women in Politics’, Personal Income Tax workshop, Notary Law, Finances for Women, y Panel discussion ‘Dealing with Social Pressure’.
Como parti di nos proyecto “Impactful Women” nos a pone luz riba diferente hende muhe local, di diferente generacion y profesion cu e meta pa promove inclusion di hende muhe na Aruba; na inicio di e proyecto aki a haci un peticion na Gobierno pa tres caya na Aruba wordo nombra cu tres nomber di hende muhe local cu a haci un impacto den nos comunidad a traves di nan logro. Actualmente conseho riba e peticion aki ta den proceso na e departamento concerni. E meta ta pa 2030 Aruba tin mes un hopi caya, edificio, retondo cu nombre di hende muhe y homber.
A realisa diferente actividad manera benta di t-shirt cu frase di nos hende muhe local riba dia internacional di hende muhe, asina generando fondo cu a bay pa Fundacion Contra Violencia Relacional, crea receta ‘budget friendly’ pa asisti durante pandemia, campaña ‘#UsForHer’ pa stimula nos comunidad pa haci promesa contra practicanan di desigualdad, zomer workshop ‘Un guia pa mucha muhe crea e futuro’ unda nos a invita mucha muhenan (teens) pa imagina e futuro y pa explora y uza nan imaginacion, ‘Stroll for the Soul mindful walk & meditation’ unda nos a empodera e participantenan femenino pa haci uzo di nos naturalesa pa preserva nan salud mental y recarga nan mes cu energia positivo, Bingo virtual pa nos miembronan, ‘Culinary Class’ na The Ritz-Carlton, Aruba BLT Steak, ‘Santa’s Cause Project’ unda WOW Aruba a haci donacion di 15 regalo pa asina mas mucha por a disfruta di pasco, y por ultimo, pa celebra e fin di aña aki a entrega un ‘New Years Kit’ na nos tur miembronan. Esaki a wordo entrega na lugar di nos ‘End of the Year Toast’ pa asina preveni contacto y posibel contagio di COVID-19.
Nos ta agradecido na nos miembronan, participantenan, siguidornan, y oradornan pa e confiansa empoderando nos y asina tambe otronan den nos comunidad. WOW Aruba ta contento di mira cu a pesar kisas cu e no tabata un aña facil pa diferente di nos, nos hende muhenan a sa di mustra resiliencia, surpasando diferente desafio den nan caminda. Nos deseo pa 2022 ta pa mas hende muhe sostene y apoya otro hende muhe, empoderando otro pa asina hunto logra tur nos metanan cu nos pone nos dilanti pa aña 2022.
Den nomber di nos presidente, directiva y miembronan nos ta desea Aruba henter un aña nobo yena di felicidad, sabiduria y logro!