Recientemente Rotaract Aruba y Grant Thornton Aruba a uni forza pa duna muchanan di Casa Cuna un ‘day out’. E evento ta forma parti di e projecto yama “December Giving” unda Rotaract Aruba ta hasi diferente actividad “hands-on” pa comunidad den temporada di fin di aña. Grant Thornton Aruba a contribui na e bunita evento den cuadro di giving den december, empleadonan a duna un parti di nan kerstpakket como donacion pa cumpra keds regalo pa e muchanan.
Den pasado Rotaract Aruba a jega di organisa movie nights na Imelda Hof mes unda cu tawata hasi setup bou di afdak serca nan. E aña aki a scohe pa un otro grupo, a aserca Casa Cuna y invita e muchanan nan pa bai wak un movie pafor di “cas”. Pa den un ambiente diferente e muchanan por a disfruta di e pelicula ‘Encanto’ na The Cinemas hunto cu nan ‘leidsters’, Rotarian y Rotaractors presente.
Durante e pelicula tur mucha a ricibi nan treat y despues di e movie, a pasa cu nan Häagen-Dazs pa asina termina e atardi cu un dushi ice-cream mientras tur mucha a ricibi nan keds regalo. Lorena Maduro, Business Process Solutions (BPS)director na Grant Thornton Aruba ta splica cu e idea tras di e regalo ta pa duna e muchanan algo cu nan por keda usa tambe despues di e temporada di fiesta.
Rotaract Aruba y Grant Thornton Aruba ta sumamento contento y agradecido di por a brinda e muchanan un atardi ‘fun’ y wak nan disfruta nan Diadomingo. No tin nada mas bunita cu mira e caranan contento na final di dia.
