Lo tin un reunion sumamente importante pa Aruba unda cu companianan di utilidad y consumidornan cu mester beneficia di un miho tarifa di awa y coriente cu e pueblo ta bin ta pidi pa varios anja caba.
Si sigui tur publicacionnan di ultimo dianan y fin di siman, lo mester tin un problema serio entre e partnernan di coalicion. Tur esaki relaciona cu un cambio haci den e tipo di reunion di Parlamento riba e tema di acuerdo firma cu Eagle LNG.
“Nada di esaki ta berdad. No tin nada di presion ni tension entre e partnernan di coalicion,” un parlamentario y tambe un personahe importante liga na e partido geel a duna di conoce. Algun otro mas no tabata kier pa menciona nan nomber como no ta persona riba lista, ni partlamentario of tin autorizacion pa haci comentario publicamente den nomber di partido MEP. Si nan por bisa cu no tin problema, pasobra a participa den reunionnan unda cu a papia riba e tema di e acuerdo firma.
Tur Parlamentario ta trankil y ta bisa cu no ta mira cu lo tin problema. A bisa cu na momento cu a haya e peticion pa cambia e tipo di reunion di un bijeenkomst pa un reunion publico, nan no tabatin ningun problema cu esaki.
A wordo splica na E Arubiano cu e mandatarionan encarga lo t’ey presente den e reunion y igualmente e compania concerni, cu ta WEB Aruba N.V. “E hecho cu a cambia di un bijeenkomst pa un encuentro publico ta mustra e transparencia cu lo bay tin pa duna informacion nesesario na e organo mas halto di nos pais y cu ta representa e pueblo.” Y a agrega cu no ta berdad cu MEP no kier pa e reunion bay door. Tampoco e ta nifica cu esaki lo por trece problema pa existencia di e actual coalicion.
A splica na E Arubiano cu e cambio di un bijeenkomst pa un reunion publico no ta nada particular. No ta prome biaha e cambio aki ta tuma luga. Tur cos ta depende kico cada fraccion ta desea pa tuma luga. Den e caso aki partido RAIZ tabata desea cu pa e encuentro di dialuna mainta tin e posibilidad di no solamente ricibi informacion, pero tambe cu nan por duna un aporte mas constructivo na e procedura hiba pa cu e acuerdo cera cu Eagle LNG.
Esnan di MEP ta lamenta e forma con politiconan opositor a bin ta atende cu e tema aki di acuerdo cu Eagle LNG cu ta uno masha importante pa futuro di Aruba, pa e companianan di utilidad y pa consumidornan cu mester beneficia di un miho tarifa di awa y coriente. “Nos mester pone weganan politico y sensacion politico pa bira popular un banda. Na e momentonan aki Aruba no ta den su miho situacion, causa door di e Pandemia. Nos ta depende hopi di Hulanda cu a bin ta yudando nos financieramente. E tipo di weganan politico aki, hunto cu esun di 12.6% no ta yuda na nada pa Aruba por sigui dilanti,” un fuente di Gobierno a informa nos.