Recientemente, dia 1 di December 2021, Departamento di Cultura Aruba (DCA) conhuntamente cu Direccion di Impuesto (DIMP) a organisa un mainta di informacion pa e gruponan di enfoke folklore esta agrupacion tipico, grupo di baile y cahanan di orgel cu ta forma parti di e proyecto di e plataforma folklore den sector turistico.
E mainta aki cu tabata bon atendi door di e gruponan di enfoke folklorico y unda hopi informacion valioso a ser duna pa locual ta e contribucion di cada grupo of sea como ‘eenmanzaak’ of un NV na e parti fiscal, pues e belasting na pais Aruba.
Di parti DIMP e charla a ser presenta door di señor Jason Jean Baptiste y señora Golda Davelaar, aki cada un presente a haya informacion kico ta e proceduranan y con nan tin di registra na DIMP si acaso nan ta formando parti como grupo cu ta entretene nos turistanan den hotel. Presente tambe tabata t’ey e Asociacion di Musica y Artistanan Arubano (AMAA) representa pa señora Nicole Booi y señora Maybeline Arends-Croes.
E mainta aki a ser organisa pa señor Chencho Kelly, lider di investigacion di e seccion di Investigacion y Documentacion di DCA y den cooperacion cu e seccion di GO & NGO representa pa señor Robert Maduro, coordinado di GO’s & NGO’s. Señor drs. Siegfried Dumfries, director di DCA, kende tambe a hiba palabra e mainta aki y el a expresa cu DCA semper ta dispuesto pa coopera y sostene e artistanan den e ramo folklorico. Esaki, tanto cu e plataforma pa cu turismo y cu charlanan di informacion riba tur topico cu ta necesario.
Pa mas informaciones por tuma contacto cu DCA via tel.: 5822185 of via mail pedrokelly@cultura.aw y/of AMAA via mail amaaruba2016@gmail.com , nan website: www.amaaaruba.com/ , riba website tin e formularionan y FB: amaa aruba .
Departamento di Cultura Aruba kier a gradici cada un cu a mustra nan interes y cu a participa nan e mainta di informacion aki.
