For di 17 te ku 22 di novèmber 2021 Boneiru a forma parti di e prestigioso bolsa di luho Masters Expo. E eksposishon akí a tuma lugá den Amsterdam RAI. Masters Expo ta e úniko bolsa komersial eksklusivo di Oropa. Durante e eksposishon akí ku ta enfoká riba e konsumidó di mas pudiente i ‘high-end’, diferente kompania manera markanan di auto luhoso, artistanan famoso i markanan di prenda luhoso ta presentá nan produkto, servisio òf eksperensia úniko. Boneiru a uni ku e operador hulandes di ‘tour’ di luho Avila Reizen den nan stènt komo un di e spònsernan prinsipal. Riba djabièrnè 19 di novèmber e ‘TCB Europe-team’ (TCB su tim oropeo) a konektá ku e operadónan di tour high-end ku tabata presente na e Expo i tambe nan tabatin un enkuentro ku e ganadó di medaya di oro olímpiko Kiran Badloe i su ‘management’.
Dia 20 di novèmber tabatin un evento di Black-Tie na e Expo. Boneiru a keda presentá na un grupo di enfoke ku hopi influensia. Sander Langeveld, Liaison Europe pa TCB a duna e konsumidónan presente mas informashon tambe tokante e destinashon den kombinashon ku prufmentu di likor di Bonaire’s Cadushy Distillery.
22 di novèmber tabata un dia ‘business-only’, negoshi só. Avila Reizen a invitá nan agensianan tòp pa partisipá na e presentashonnan di spònser. Boneiru a haña oportunidat pa mustra kiko tin pa ofresé komo destinashon na e agensianan di biahe high-end akí. ‘E mas ku 50 agensianan di biahe tabata hopi kontentu ku nan a haña sa mas tokante Boneiru i e posibilidatnan ku e destinashon tin pa ofresé na nan klientenan’, segun Ryan Hart, Liaison Europe di TCB.
