Recientemente Aruba Tourism Authority (A.T.A) a facilita un tayer pa e coachnan di Qredits
Aruba cu e meta pa e team di e institucion aki ta miho ekipa cu conocemento di kico
exactamente ta “niche tourism” pa por brinda e miho guia na clientenan cu ta desea di cuminsa
of sigui desaroya un negoshi den e segmentonan aki. “Niche tourism” ta referi na con un
producto, servicio of interes di turismo por wordo adapta pa cumpli cu necesidadnan di un
segmento specifico di e mercado.
Qredits Aruba a organisa e sesion cu e meta di por mantene e coachnan como tambe
consecutivamente empresarionan local miho informa y educa ariba oportunidadnan pa crea
producto, servicio y experiencianan cu ta sostene e metanan a termino largo di e industria di
turismo. Esaki den cuadro di e desaroyo sostenibel y basa ariba evolucion unda e
empresarionan ta bin cu producto of servicionan diferente pa nan clientela.
Den e tayer aki a pone enfasis riba e mercadonan “Wellness, Romance, and Adventure”, esta
Bienestar, Romance y Actividad activo. A discuti kico ta e esencia di un niche versus un
producto; y kico ta e elementonan y factornan cu ta categorisa un producto of servicio como un
experiencia “niche”. Y con e futuro di niche lo sigui evoluciona asina brindando un oportunidad
pa por provee den e deseonan di nos futuro bishitantenan.
E iniciativa aki ta parti di un programa nobo desaroya pa A.T.A. cu ta hiba e nomber “Aruba
Signature Experiences. Qredits Aruba ta encarga pa selecciona un maximo di cinco (5) negoshi
cu ta cumpli cu e criteria presenta dor di Aruba Signature Experiences Program. E seleccion ta
tuma luga basa riba entre otro e plan di negoshi entrega pa e empresarionan cu ta contribui na
e desaroyo niche riba nos isla.
Naturalmente ta brinda oportunidad na tur empresarionan existente cu tin un idea pa un
experiencia turistico unico y inovativo den e area di romance, bienestar of actividad activo y
kier haci esaki un realidad den 2022. Pa aplica por bay na www.qredits.com y asina entrega un
plan di negoshi (business plan) conhuntamente cu un plan di financiamiento, pa por ta parti di e
seleccion pa Ariba Signature Experiences 2022. Haci uzo di e oportunidad aki.
