Awe Prome di december pa 1 or di merdia gobernador interino Agustin Vrolijk tabata presente na parlamento di Aruba unda cu griffier a duna algun palabra. Gobernador Agustun Vrolijk a presenta su mes na parlamento di Aruba unda cu lo e representa gobernador di Aruba na momento cu e ta afo di Aruba. E tarea di un gobernador ta mira di serca e interes di Reino pa Aruba y interes di Aruba den Reino. Gobernador entrante lo haya e puesto aki pa 6 anja largo.
Honorabel presidente di Parlamento,
Honorabel miembronan di Parlamento,
Su excelencia Evelyn Wever Croes, Prome Ministro di Aruba,
Ministronan di su Gabinete, y Secretario di Conseho di Ministro
Gobernador suplente anterior, señora Laclé-Dirksz,
Representantenan di e Alto Consejalnan di Estado, Raad van Advies y Algemene
Rekenkamer,
Miembronan di Prensa,
Pueblo di Aruba,
A wordo anuncia,
Mi a wordo nombra como Gobernador suplente pa Aruba.
Rey Willem Alexander, hefe di Reino Hulandes a firma e Decreto Real.
Na tur cu a haci esaki posibel, mi mas sincero agradecimiento; mi famia y mi mes
ta sinti nos honra pa esaki.
E tareanan di e Gobernador (y den caso di su ausencia) di e Gobernador suplente
ta consisti di dos parti:
1. E Gobernador ta representa e gobierno di Reino;
2. E Gobernador ta na cabes di e gobierno di Aruba.
Den e lectura di e texto di huramentacion ta para cierto puntonan cu e
representante di Rey lo mester atene su mes na dje.
3
Esakinan ta entre otro
– Cu pa haya e posicion aki e no a priminti ningun hende algo;
– Cu e lo promove e adelanto di Aruba manteniendo su mes na e Constitucion
di Aruba y Reglamento di orden pa Gobernador.
Mi a pidi Dios Todopoderoso pa yuda mi cu ehecucion di mi funcion honorabel nobo
y pa sigui guiami pa sirbi mi pais dignamente. Experiencia di casi 40 aña den trabou
di Gobierno lo yudami den esaki.
Señor Presidente,
Awe mi ta para aki no solamente pa presenta mi mes na parlamento y e
representantenan di e comunidad Arubano, sino tambe pa declara mi boluntad pa
traha pa progreso di nos pueblo.
Den mi añanan di hubentud mi a corta aloe, piki piedra pa Lago y mi a mira con
Aruba a pasa den varios desaroyo economico y social pa nos yega unda nos ta awe.
Señor Presidente,
Nos a pasa den un tempo basta dificil mescos cu paisnan grandi y ainda nos ta
nabegando, pero e awanan no ta trankilo; ainda ta bin olanan grandi cu ta stroba
nos di bay dilanti. Y hunto nos tin cu percura pa coordina, controla y guia pa evita
peligronan mayor.
Fuera di e dificultadnan actual, ya nos sociedad tabata tin situacionnan cu mester
un solucion o a lo menos hopi atencion di nos tur.
Señor Presidente, miembronan di Parlamento y Gabinete Wever Croes,
Educacion y enseñanza ta un di e pilarnan cu ta sostene nos sociedad y tin hopi
influencia riba desaroyo total di e pueblo di Aruba.
Conocemento di loke tin den tera, den lama, riba tera y den espacio nos por busca
riba Google o otro fuentenan di informacion. Y si nos no haya loke nos ta busca ey,
nos por bay hasi investigacion.
4
Loke mas ta preocupa nos ta educacion.
Si e pilar aki ta faya, ta krak, ta kibra, esaki lo causa problemanan grandi den nos
sociedad. E fayonan tin rimpeleffect y ta wordo sinti den tur ramo di nos sociedad.
Nos ta mira, y lastimamente hende grandi tambe ta mustrando, un falta pa loke ta
e virtudnan manera respet pa nan mes y respet pa otro, disciplina, tolerancia,
convivencia, husticia, empatia, gratitud y sentido di responsabilidad.
E virtudnan aki no ta cosnan cu bo ta haya for di buki o bo por baha nan for di
Google.
Ta mayor tin di siña yiu, e maestro mester siña su alumnonan. Lidernan di
comunidad y comunidad en general ta demostra kico e virtudnan aki ta y con ta
practica nan. Ta un interaccion entre hende.
Esnan cu no tin, o no ta practica e virtudnan aki, naturalmente no por pasa nada pa
otro. Loke nos muchanan ta siña ta loke nan ta mira di hende grandi.
Mescos cu den otro paisnan nos sociedad ta bou hopi presion y influencia di
television y medianan social. Den nos interaccion cu otro hende, si nos no sa con e
comportacion mester ta, conscientemente y inconscientemente nos ta aplica loke
nos a copia for di e medianan social.
Pesey nos hubentud y sociedad en general mester wordo fortalece den nan ser
humano. Y esaki no ta cu cosnan material, pero cu bon ehempel, guia pa biba segun
e bon virtudnan universal.
Señor Presidente,
Futuro di Aruba ta depende di kico nos hubentud ta bay hasi den futuro. Esaki ta
trece cune cu mester cooperacion, participacion, mente habri pa acepta opinion di
otro y crea harmonia den pueblo.
5
Sociedad en general cu mester practica e bon virtudnan. Nos tur lo ta orguyoso si
nos por influencia nos sociedad positivamente y yuda lanta e hubentud di Aruba cu
e bon virtudnan y asina hasi di un bon hende, un miho hende.
Señor Presidente, miembronan di Parlamento,
Ministronan di Gabinete Wever-Croes, y
Pueblo di Aruba,
Mi ta sinti mi afortuna di por asumi e funcion honorabel aki.
Lo mi haci tur esfuerso pa ehecuta e funcion aki mes bon y cu mesun dedicacion cu
e cuatro Gobernadornan suplente anterior di Aruba.
Mi ta priminti un bon cooperacion cu Gobernador di Aruba, Su Excelencia Alfonso
Boekhoudt, pa hunto nos sirbi nos pais durante e añanan benidero.
Lo mi percura pa salvaguardia e principionan di nos Reino y di nos Pais.
Masha danki, señor Presidente
