Diaranzon 24 di November 2021, durante un conferencia di prensa Minister Ursell Arends a elabora riba situacion di nos medio ambiente na Aruba. Te ainda no ta tur hende ta compronde e seriedad di e situacion di nos medio ambiente y e impacto cu esaki por tin pa nos Pais, nos hendenan y nos turismo.
Desde 2018 como politico sr. Arends ta bin ta señala cu nos RWZI- Bubaliplas ta un “timebomb” tanto pa nos hendenan como nos bishitantentenan. Ja den 2019 tin estudionan haci riba peticion di DNM, door di expertonan riba e tereno. E resultadonan aki ta compila den raportnan cu ta indica cu e bida maritimo den awanan di Aruba ta aden ta den estado critico y cu e calidad di nos awanan di lama ta empeorando.
Tanto RWZI na Bubali y e dump di Parkietenbos ta sigi causo impacto negativo den nos lama y ya caba a afecta nos coralnan cu awor ta cubri solamente 6% di suelo di lama envez di un nivel sano di 40%, cual ta e standard den nos regio.
Nos medio ambiente ta afecta directamente nos unico pilar economico e ta di suma importancia pa actua rapido y desde nos amor pa nos Pais. Akinan ta caminda cu sosten di sector priva y cu ayudo di Hulanda por yega na fondonan cu ta necesario pa implementa solucionnan riba corto termino.
Minister a reuni cu varios stakeholders pa pone nan na altura di e situacion preocupante. Ta importante pa keda splica na comunidad e gravedad di e situacion y cu esaki tin su efectonan riba nos tur como habitante di Aruba. Esaki no ta un situacion cu tin solucionnan facil y lo costa placa pa resolve, pero no obstante mester sigui cana e caminda pa salba nos naturalesa. E situacion di berdad ta alarmante pero actuando rapido nos por salba nos Pais di consequencianan grave pa comunidad y turismo.
Di mesun forma y cu mesun urgencia tin atencion pa e dump na Parkietenbos. Ningun hende ta desconoce tur e molester y impacto riba salud di e habitantenan di Parkietenbos. Banda di esey tambe tin impacto riba nos bida maritimo y nos awanan di lama. Den comunidad ta reina opinionan diferente riba e tema di incinerator como un posibel solucion pa e problema di desperdicio. Realidad ta cu pa awor aki esaki ta un solucion factibel cu ya a demonstra di ta efectivo. Apesar di critica, e incinerator a cuminsa desminui e molester di candela y huma. Pa comproba esaki tin prueba scientifico. Gobierno a inverti 400 mil florin den un machine cu actualmente DOW y DNM ta monitor y midi emisionnan di e incinerator. Di e forma aki ta sigura cu e proceso nobo aki lo no afecta calidad di aire den vecindario.
Door di pone debido atencion na RWZI y Parkietenbos Minister Arends kier mustra pueblo cu e salud di nos habitantenan y nos medio ambiente ta keda un prioridad p’e.: “tur hende cu tin Aruba na pecho mester ta conciente di e seriedad di e situacion como tambe su impacto riba nos calidad di bida. P’esey nos mester anda cu prudencia y enfoka riba e solucionnan pa salvaguardia nos baranca stima”.
