Ala Femenino di Partido MAN ta sumamente satisfecho i orguyoso di e èksito di e promé
edishon di “Menstruashon Solidario” ku a keda organisá resientemente.
Durante e simanan aki, Ala Femenino di Partido MAN a kolektá “maandverband” pero alabes
papia riba tabú di pobresa menstrual ku ta nifiká falta di akseso na produktonan di uso
pèrsonal pa e periodo di menstruashon, manera p.e. “maandverband”/kotèks.
Pero tambe konsientisa riba e periodo di mentruashon di hende muhé.
E pobresa menstrual a bira aun mas tantu den nos region i mundialmente debi na e pandemia
di COVID-19.Y di e manera aki konsientisá mas tantu ku ta possible riba e tema aki.
Na Kòrsou tambe hopi hende muhé ta pasa den situashon fèrfelu òf nan ta pèrdè dia di trabou
òf di skol pa motibu ku no tin sèn pa kumpra produktonan di uso pèrsonal pa su menstruashon.
Hopi hende muhé ta haña nan den e situashon ku e menstruashon ta presentá ora nan ta na
trabou, skòl òf un luga públiko i nan no tin e produktonan ku nan tin mester di dje pa motibu
finansiero / sosial no opstante e produkto aki ta den makuto basíko.
Den kuadro di empoderamentu di nos hende muhénan, Ala Femenino di Partido MAN a
organisá dos djasabra di “drive thru” ku a karga e number Menstruashon Solidario. E “drive
thru” a tuma lugá na sede di Partido MAN i a kolektá un kantidat grandi di produktonan di uso
pèrsonal pa menstruashon.
Tur loke keda kolektá, a keda paketá i repartí na entre otro prizon (SDKK) i instansianan di
hoben manera GOG, Casa Manita, Kas Bruder Pius i Huize Rose Pelletier pero tambe na
Voedselbank. E siman aki a ranka sali ku repartishon di paketenan di “maandverband” na no
menos ku 50 skol básiko i avansá aki na Kòrsou.
Ala Femenino di Partido MAN ta gradisí pueblo di Kòrsou ku a duna oido na e proyekto kaminda
pueblo di Kòrsou a koperá en grande.
Di e manera aki Ala Femenino di Partido MAN a kontribuí na e konsientisashon ku
menstruashon no mag di kondusí na miedu, eksklushon i bèrguensa, pa motibu ku biba ku
diginidat durante menstruashon tambe ta un derecho humano.
Den kuadro di stimulashon di konsientisashon rondó di menstruashon, e organisashon
femenino di Partido MAN ya a stipulá ku nan ta bai organisá un evento partikular riba djasabra
28 di mei 2022 pròksimo, kual ta Dia Internashonal di Higiena Menstrual. Riba e fecha aki, ta
para ketu na e importansia di un bon maneho di higiena menstrual globalmente.
