Recientemente Minister di Enseñansa y Deporte Endy Croes taba
tin su prome encuentro pa sera conoci y combersa cu e cabesantenan di scolnan preparatorio y basico di Dienst Publieke Scholen cu ta resorta directamente bou di Ministerio di Enseñansa. E reunion a tuma luga na JFK Education Center. E tabata un bon reunion y fructifero unda cu e cabesantenan por a vocifera nan preocupacion y inkietudnan. Hunto cu Minister Endy Croes su dos conseheronan riba tereno di enseñansa sra. Swinda Winterdaal y sr. Ivan Croes tambe tabata presente pa scucha diferente puntonan di preocupacion a wordo treci pa dilanti.
Durante e reunion abierto a trata diferente puntonan cu a bin dilanti cu formador. E topico manera entre otro; (1) E maneho di no keda sinta di alumnonan den scolanan. (2) A pidi cada cabesante pa indica cuanto remplasantenan minimo tin mester pa e trabou diario por continua. (3) Cada docente a vocifera nan opinion y a indica si nan kier sigui cu e incorporacion di scolnan preparatorio y basico. A dialoga riba e digitalisacion cu kier implementa pa a traves di un sistema moderno conecta DPS cu tur su scolnan. E inkietudnan lo wordo atendi y lo combersa cu expertonan, ekipo di maneho di DPS y ‘stakeholders’ riba e tereno di enseñansa pa e desicionan por wordo tuma na bienestar di educacion y henter Aruba.
Minister Endy Croes a scucha cu atencion tur puntonan cu a keda treci dilanti y e prioridadnan pa cu e tereno di enseñansa. Minister Endy Croes su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion den e tereno di Enseñansa.
