Sidney Ponson tal informa na tur amantenan di pesca cu ta unicamente 2 dia pa registra pa e Wahoo Shootout cu lo tuma luga dia 4 di december awor na Varadero.
E Wahoo Shootout ta un torneo di Sidney Ponson Charity Foundation, pa recauda fondo pa actividadnan cu e organisacion filantropico aki ta bay organisa.
E fundacion ta haci un invitacion na tur amantenan di pesca pa haci uzo di e dianan cu ta keda pa registra. E ta un bon momento pa contribui na un bon causa, pero tambe pa pasa un dia den ambiente familiar y e chens di gana e grandslam cu ta un premio di 25 mil florin.
Banda di esey tin premio pa ambos categoria di boto: esta di 32 pia of menos y esnan di 33 pia of mas. E prome premio ta 6 mil florin; 4 mil pa di dos premio y 2 mil florin pa di tres premio. Esaki ta conta pa ambos categoria. Tambe tin un premio di 500 florin pa esun cu catch e Wahoo, Dorado, King Fish of Baracuda di mas grandi.
Banda di e premionan ariba menciona, tin un categoria adicional cu ta pa recauda fondo pa Sidney Ponson Charity Foundation. E competencia di Blue Marlin ta uno adicional y ta valido solamente pa e botonan di 32 pia bay ariba. Cada boto ta paga 500 pa participa den e seccion aki di cual 20% ta bay pa SPCF y e resto ta pa e ganado. E Blue Marlin mester ta 300 liber bay ariba.
E torneo di pesca aki ta manera un Dia Familiar, ya cu mientras cu tatanan ta riba lama participando den e competencia aki, na Varadero lo tin evento pa entretene famia.
E team di SPCF ta sumamente contento di e apoyo cu nan a ricibi di Centro di Pesca Hadicurari y otro centronan di pesca den organisacion di e evento aki.
Esnan interesa por registra y manda nan datonan pa: sidney.spcf@gmail.com of na carlmichael.spcf@gmail.com of na 5944326 inscripcion ta costa 1000 florin.
