Gobierno a tuma su tempo pa firma pa negocia un bon areglo cu por cumpli cu ne
Durante Conferencia di Prensa di Gobierno di Aruba dialuna mainta, Prome Minister Evelyn Wever-Croes a informa tocante e elementonan den e Landspakket. Despues di 13 di November aña pasa, Gobierno a firma e landspakket. Ya ta un aña caba cu Aruba ta den e landspakket. Un aña, Prome Minister ta considera, un aña hopi dificil.
Prome Minister a enfatisa cu prome cu Gobierno a yega na firma e landspakket aña pasa, a tuma tur tempo pa negocia un bon areglo. E prome propuesta cu Hulanda a duna na juni, Gobierno no por a acepta y a sinta na mesa y negocia di juni te cu november. Den proceso, Gobierno a haya hopi presion pa firma pa caba, presion interno den e gremionan.
Pero pa 2 motibo, Prome Minister a duna di conoce, Gobierno no a core firma e Landspakket. E prome motibo ta pasobra Gobierno tawata kier ta sigur cu ta saca un trato husto. Berdad Gobierno tawata lomba contra muraya door di e pandemia pero pa Gobierno, esey no kiermeen mester acepta tur inhusicia. “P’esey nos a negocia te november ora nos tabata tin un propuesta riba mesa cu nos por a biba cu ne”.
E di dos motibo pakico Gobierno no a core firma di biaha, Prome Minister a enfatisa, cu e, como Prome Minister ni Gobierno lo a firma algo si nan no tabata sigur di por a cumpli cu ne.
Prome Minister a duna di conoce cu e landspakket tras di lomba aki a exigi hopi trabou di hopi hende pa cua e ta sumamente agradecido na cada un di nan. Nan a dedica nan mes pa Gobierno por a duna contenido na e palabracionnan. E landspakket ta contene 8 area di cual e prome 4 nan ta areanan similar cu ta e areanan financiero cu ta wordo traha ribe dje den e landspakket.
Tema A: e maneho financiero di gobierno.
Tema B: e gastonan y efectividad di sector publico.
Tema C: Impuesto.
Tema D: Sector Financiero, bancario.
Durante e aña tras di lomba varios estudio a wordo haci con pa tin un miho maneho financiero, con pa baha gastonan, traha mas eficiente, mehora sector financiero y con pa drecha impuesto.
Tema E: reformanan econmico. Akinan tambe estudionan a wordo haci pa mira kico por haci pa desaroya nos economia mas lihe. Prome Minister a indica e rapport ta kedando cla den e dianan aki.
Tema F: cuido. Aki tambe tin varios deliberacionnan tumando luga, e estudionan no ta cla ainda. Aworaki, nan a busca un profesor Hulandes tambe pa yuda pa asina por garantisa calidad di cuido.
Tema G: enseñansa. Akinan tambe estudionan a wordo haci door di Inspectie Onderwijs di Aruba y di Hulanda. E rapport tambe ta den keda cla pa presenta na stakeholders.
Tema H: con nos por haci den nos estado di derecho ta mas fuerte. E ta mas den areanan di husticia, proteccion di nos fronteranan. Con por traha hunto pa construi un Aruba mas husto y sigur.
Riba cada un di e areanan aki ya ta wordo traha un aña caba pa nos por tin mehoracion y pa hunto delinea kico a e miho pasonan pa Aruba tuma”, Prome Minister a duna di conoce.