Un salud positivo tabata tema di un charla cu a tuma luga recientemente bou iniciativa di e programa Scolnan Saludabel. E charla tabata dirigi specialmente pa sector di enseñanza. Y un di e docentenan cu a participa tabata Roke Hoen, docente di temanan di salud na Instituto Pedagogico di Aruba (IPA) a partisipa na e programa aki cu sra Evelien van dort a bin duna presentacion di dje.
Scol Saludabel ta un programa cu ta guia e scolnan di Aruba pa yega na scolnan saludabel.
Pa loke ta e charla a elabora riba un salud positivo cu ta enfoca pa siña e hendenan pa mira e salud cu mas cu solamente bon of malo. “Salud ta consisti di diferente area y ta bon pa bo tin e diferente areanan den balans. Loke cu a keda introduci door di sra Evelien van Dort di Hulanda tabata un instrumento pa refleha riba nan bida y salud, y determina con nan bienestar ta riba diferente aspectonan. Manera bienestar fisico, emocional, social, mental y con bo ta sinti bo mes den diferente parti di bo bida,” el a splica. Y a bisa cu e ta bay con cada persona ta sinti su mes cu su famia, su amistadnan, na trabou of den circulo social.
Enfocando di e forma aki, e persona ta mira e salud di un forma hopi mas amplio, cu ta hopi importante. Como docente di formacion personal na IPA, ta determina con un mucha ta desaroya. Si un adulto den un posicion asina considera cu ta importante cu e mucha mester ta saludabel riba diferente tereno cu no ta solamente comemento y movecion, ya caba tin un avance grandi. Awo aki tanto como come saludabel como haci ehercicio ta haya suficiente informacion. Importante ta pa duna mas atencion na salud mental, e parti social y emocional.
Esaki no ta haya suficiente atencion na e momentonan aki. “SI nos cuminsa wak salud den un forma holistico, e ora nos por yuda e generacion pa nan tambe mira di e forma aki. Locual por ripara si, ta cu ora di duna les y bini cu e topiconan nobo aki, e alumno ta hopi receptivo. Pero e dolor di cabes ta cu e cambio mester wordo carga door di scol y e mayornan. P’esey mi ta keda bisa cu ta nos como mayor y docentenan mester duna e bon ehempel. E ora e muchanan di mes ta bay desaroyonan mes di un forma positivo y holistico.”
