Elite k9 Club a wordo funda na 2017 cu e vision di bin cu algo apart y diferente pa yuda conscientisa e doñonan di cacho pa ta mas activo cu nan mascota y no djis duna nan cuminda y lag’e para den cura of cera.
Desde aña pasa 2020, nos a cuminsa cu eventonan pa nos mascotanan preferi di cas. Den pasado nos por corda cu tabatin “fun dog walk” cu tabata un exito completo. Nos di Elite kier a bin cu algo diferente. Elite a cuminsa cu entrenamentonan di obedencia pa nos cachonan di rasa of crioyo, sin ningun excepcion.
Despues di par di luna a topa cu varios geleider cu Herdernan cu hopi energia. Despues di basta reunion y evaluashon, nos a dicidi di cuminsa cu un programa special pa e tipo di cachonan aki mirando nos conocemento y experticio den e ramo di cachonan pa trabao. Nos a bin cu entrenamento pa cachonan cu ta sport y/of bitework cu den realidad no ta algo nobo, mirando cu na diferente parti mundo e sport aki ta activo.
Por ehempel na Francia tin e French Ring, Belgium Ring na Belgica. Hulanda ta conoci pa su KNPV y Alemania pa Schuzthund. Kico ta e beneficio di bitework pa e tipo di rasa aki? Pa e cachonan cu ta agresivo of fada, e ta haci nan mas tolerante y menos tenso y evita cu nan lo baha nan agresividad den cas of den publico y/of riba un persona.
Bitework ta siña un cacho controla su impulso, pa tin mas pasenshi y ta mas enfoca. Un persona cu no tin conocemento di esaki, no por tin conocemento di cacho. Un cacho no ta pa tira den cura, brasa y duna awa y cuminda so. E ta bay hopi mas aleu cu esaki.
Hopi persona tin problema na cas, paso cacho ta kauw tur cos den cura y/of den cas. E motibo di esaki ta, cu nan ta baha nan frustracion y nan energia riba obhetonan y hasta tin biaha riba hende, mirando cu henter dia nan ta para y no ta haci nada mas cu come y bebe awa. P’esey ta sumamente importante pa cana, train y haci weganan cu por reta nan mentalmente.
Pa asina nan por keda fit, gasta nan energia na un manera positivo pa evita e tipo di stress aki. Elite K9 Club tin diferente entrenamento. Obedencia ta e grupo di mas grandi cu ta pa tur cacho, entre otro crioyo cu ta e cachonan mas comun den e grupo aki. Advanced training a wordo lanta door di nos mesun miembro cu a caba obedencia y kier sigui cu entrenamento.
Akinan tambe mayoria di cacho ta crioyo. Elite no ta un club cu ta enfoca riba un tipo di cacho solamente, nos ta entrena tur, sin descrima niun. Tur tin diferente talento. Durante entrenamento di obedencia e cachonan ta siña sit, down, stay, heel y forward.
Nan no ta wordo entrena pa haci triki y mucho menos pa ta den un circo. Den advanced training nan ta siña un parti di obedencia mas avansa. Ademas di esaki, nan ta siña e obstacle course, locual su beneficionan pa un cacho ta haci ehericicio, diberticion, stimula nan mente y pa nan ta mas agil. Hopi biaha nos ta wordo acerca door di doñonan cu cachonan agresivo cu no ta wordo acepta na otro scolnan, pa mesun motibo di agresividad.
Locual cu ta pasa cu e cachonan aki ta nan bay den e parti obedencia y despues den e advanced training, pa asina por entrena cu mas cacho y nos ta enfoca den e parti socialisacion cu e meta pa kita e agresividad di e cacho. E tipo di cachonan aki, nunca no por yega e parti di sport.
E motibo ta cu un cacho sport no ta un cacho agresivo nan ta cachonan cu drive halto entre otro pa bala of pa bijtmouw/pak. Nan no ta morde abase di agresividad. Pakico ta importante pa tuma cachonan brabo? Paso si no coregi nan comportacion, nan por bira un peliger pa otro cachonan y/of otro persona. Nos di Elite ta duna tur cacho nan fair chens, sea ta cacho di rasa of no.
Bayendo bek den e parti sport/bitework, acualmente Elite tin solamente 7 cacho entrena y activo. Mirando cu no ta tur cacho ta apto pa haci esaki, e cachonan aki no ta basa riba agresividad. Mi ta invita henter pueblo di Aruba pa bin un entrenamento di nos working dogs y por brasa nan sin ningun problema.
Aruba no tin problema solamente cu cachonan riba caya, sino tambe problema di alcohol, droga y personanan ignorante cu no tin e conocemento di working dogs y/of sport dogs. Nos cachonan no ta wordo maltrata ni ta wordo entrena pa bay guera. Ora nos ta papia di test nan den luz of zonido nos ta referi na e parti social di e mascota.
Hopi biaha cachonan tin miedo riba caya, entre otro di auto, brommer, zonido drukte, etc. Locual nos ta haci ta sali cu nan riba caya y duna nan e siguridad pa no tin miedo di e cosnan aki. Esey por a wordo mira na nos evento tambe.
E aña aki Elite a duna mas cu cincuenta demostracion pa scolnan, camping, daycare, imelda hof, Orthopedagogisch Centrum, Fundacion contra violencia relacional, Favi, Sonrisa, Trampolin pa Trabou y otro instancianan. Nos a encarga den pone un sonrisa riba miles di mucha y sin haci ningun persona of mascota daño.
Nos demo team ta consisti di dos cacho crioyo, un scapa di Kill Cage y e otro adopta for di un fundacion. Tambe dos Herder cu ta haci e parti sport, mucha ta haya chens di cana cu e cachonan aki tambe. Nos ta habri semper nos demostracionnan cu e pregunta na e muchanan: kico tur un cacho mester ora di wordo adopta of cumpra. Tur mucha ta haya un oportunidad di contesta esaki. Tin ta bisa: un bon cas, awa, cuminda, training, doctor, tempo y hopi biaha nos ta bisa nan cu un cacho mester di hopi tempo, amor y cariño. No busca un cacho djis paso e ta chikito anto ora e bira grandi no ta worry mas cu ne. Tambe semper nos ta conta e storia con nos dos cacho crioyo a wordo scapa y con sabi nan ta. Semper enfoca den e importancia cu un cacho mester ta bon entrena y bon cuida. Nan no ta cacho siña pa haci triki y mucho menos pa entretene hende. Nos evento nan no ta pa cacho di rasa so. Nos club tin hopi cachonan crioyo. Nos eventonan no tin parada pa cacho, simplemente 1 bes pa aña e doñonan ta saca e cacho for di su cura, bisti nan mascota algo leuk y saca potret cu nan.
Tambe ta bon pa sa cu Elite, ademas di duna demo na scol y conscientisa nos muchanan. No solamente den e parti di cacho, pero tambe den e parti di alcohol y droga. Elite ta conta cu su propio USAR team. Urban Search and Rescue Team.Esakinan ta Cacho cu ta entrena pa busca hende perdi den mondi of den caso di calimidad.
Den mas cu un ocacion nos voluntarionan a sali den busca di hende perdi. Esakinan niun no ta un wega, e ta algo cu nos ta haci pa nos comunidad y nos mascota preferi di cas. E no ta algo desconoci pa e comunidad cu nos intructornan tin nan trabou y ta forma parti di KPA. Cada un tin añanan ta dedicando na nos comunidad, sea den trabao of cu e club. Tambe nos tin programa pa conscientisa nos comunidad pa ta doño responsabel di nan mascota.
Nos tin contacto cu differente veterinario y organisacionnan. Elite K9 Club ta un Dog Training Club cu ta haci hopi trabounan voluntario y alabes nos mesun trabao. Nos ta yuda tur caminda cu por, por ta no na mesun manera cu nos fundacionnan tradicional. Pero atrobe mi tin cu remarca nos ta un Dog Training Club. Mi kier gradici tur nos miembronan cu ta tuma hopi tempo y dedicacion pa cu nan mascota pa zorg pa semper ta bon cuida.
