Minister di Turismo Sr. Dangui Oduber tabata den e area di Arashi conhuntamente cu e CEO di ATA Sra. Ronella Croes na unda a presenta e proyecto di boei na pueblo di Aruba. Minister Oduber a duna di conoce cu ya pa varios aña e boeinan no ta den nan mihor estado. E proyecto aki lo wordo financia pa ATA y si tur cos ta bon lo ranca sali e siman aki mes y lo tin un duracion di 6 siman, segun e mandatario.
Minister Dangui Oduber a menciona cu ya prome cu e pandemia tabata tin planes pa drecha y remplasa e boeinan caba. Pero unabes e pandemia a yega Aruba tur e plannan mester a wordo para. Awor cu turismo ta recuperando ATA ta bolbe haya e fondonan disponibel pa por ehecuta e proyecto di boei. Esaki ta un di e varios proyectonan bunita y positivo cu ATA tin den su “corporate plan” den cuadro di e mehoracion di e producto Aruba.
Minister Oduber a sigura cu su maneho pa cu e segundo termino ta basa riba e turista cu ta gasta. Cual ta nifica cu lo bay enfoca riba e perfil di turista di “High Value Low Impact Tourism”, pa es motibo producto Aruba su desaroyo tambe mester refleha esaki. Esaki nan ta e turistanan cu ta gana mas di 150 mil dollar pa aña y alaves ta respeta nos naturalesa y balornan cultural.
E proyecto di boei lo percura pa duna mas seguridad pa landradonan local y tambe e turistanan esaki ta hopi importante y esencial. E areanan cu lo bay haya boei ta, e area di Arashi, Malmok, Tres trapi, Palmbeach y Costa Linda. Den e proyecto aki lo bay pone boei nobo unda cu no tin boei ainda. Caminda cu ya tin boei caba lo purba scapa mas boei posibel por medio di reparacion y reamplasa esnan cu no por wordo drecha pa boei nobo. E proyecto di boei lo bay wordo ehecuta pa e compania di Varadero.
Finalmente e mandatario kier a gradici ATA pa pone e fondonan disponibel pa asina haci e proyecto aki un realidad. Aruba su turismo progresando, pronto lo yega 100% di recuperacion, Turismo ta keda e driver di nos economia.
