Sint Maarten a entrega Colegio di supervision financiero di Corsou y Sint
Maarten (Cft) un proyecto di presupuesto pa 2022 y, di acuerdo cu e Ley di Reino di
supervision financiero (Rft), mester aprob’e e aña aki mes ainda. Cft ta urgi Gobierno
particularmente pa limita e gastonan y aumenta e entradanan, entre otro door di mehoracion
di cumplimento cu e obligacionnan fiscal. Gobierno di Sint Maarten ta para dilanti di retonan
grandi, pero cu sosten di Hulanda y di e Fondo Fiduciario por realisa e reformanan tan
necesario y traha structuralmente na e mehoracionnan.
Economia di Sint Maarten ta recuperando bon. Pa e aña aki FMI ta calcula un crecemento economico real
di 4% y pa otro aña di 15%. Otro aña ta spera un miyon pasahero di crucero y 1,1 miyon di movemento
di pasahero na vliegveld. Pa un mayor recuperacion, renovacion di e aeropuerto ta esencial. Tambe ta
importante pa inverti e proximo añanan den e infrastructura di caminda y den haf.
Aprobacion di presupuesto na tempo Sint Maarten tin dificultad grandi cu aprobacion di presupuesto y di e documentonan di hustificacion financiero na tempo. Sint Maarten a aproba e presupuesto di 2021 dia 9 de september. Segun e Rft, esaki ya lo mester tabata e caso dia 15 di december di aña pasa. Sint Maarten a entrega e proyecto di presupuesto di 2022 na Cft dia 27 di october. Cft ta urgi pa aproba e presupuesto di 2022 na tempo, pa Gobierno ricibi mandato di Parlamento pa ehecucion di e presupuesto.
Debe publico y subsidio di gasto di salario Sint Maarten a ricibi na 2021 ANG 118 miyon na sosten di likidez den forma di un prestamo di Hulanda na 0% di interes. E debe publico di Sint Maarten ta aumenta te na ANG 1.398 miyon, loke ta nifica aproximadamente 79 porciento di e Producto Interno Bruto. Aki ta trata di mas di 23.000 florin pa habitante.
Un parti importante di e sosten aki ta destina na subsidio di gasto di salario. Na 2020 a paga
na e empresanan ANG 72 miyon na subsidio di gasto di salario y pa 2021 ta presupuesta e montante na
ANG 53 miyon. Entrante dia 1e. di october a para e subsidio di gasto di salario. Sint Maarten tin si un
retraso considerabel den tramitacion di e peticionnan di subsidio y den stipulacion definitivo di e
subsidionan di gasto di salario. Cft a urgi pa soluciona e retraso aki prome cu dia 1e. di december 2021
y pa indica cua parti di e subsidio di gasto di salario a paga di mas.
Presupuesto balansa na 2023
Pa 2022 Sint Maarten ta spera ainda un deficit presupuestario considerabel. Pa limita un aumento mas
grandi ainda di e debe, Sint Maarten lo mester reduci e gastonan y aumenta e entradanan, na prome
instancia pa medio di medida cu ta aumenta cumplimento. Pa 2023 Sint Maarten lo mester realisa
ekilibrio presupuestario y un surplus pa e añanan posterior, di moda cu por cuminsa cu pagamento di e
debe. Un ekilibrio riba servicio ordinario den presupuesto tin como bentaha cu Sint Maarten por reclama
prestamo di capital cu registro Hulandes.
E fondonan di cuido
E situacion financiero di e fondonan di cuido na Sint Maarten ta preocupante. Segun calculacion, pa fin di
2021 e deficitnan di e Fondo di Seguro Medico (ZV), di Seguro di Accidente (OV) y e Fondo di Seguro
Medico di Pensionado di Gobierno (FZOG) lo subi te na ANG 328 miyon. Esaki ta un situacion
insostenibel. P’esey, dia 1e. di januari 2022 lo subi e limite salarial pa e areglo di gasto medico y di
accidente na ANG 120.000, lo ahusta e contribucion di e empleadonan den sector publico mas na esnan
den sector priva y e mandatarionan politico lo bay contribui na e seguro medico. Ademas, ta importante
pa, na termino cortico, substitui remedi specifico cu remedi generico. Cu esey Sint Maarten por spaar un
suma di aproximadamente 12 miyon florin pa aña.
Maneho financiero
Cft ta enfatisa e importancia di mehoracion di e maneho financiero den colaboracion cu organisacion di
trabou temporal y ta sali di e punto di bista cu realmente lo cumpli cu e fechanan limite stipula. Cft ta
balora positivamente e medidanan inserta den e pakete di Pais Sint Maarten, incluso creacion di un
programa di cumplimento na Servicio di Impuesto. Ta necesario pa finalisa mas pronto posibel e
discusion cu Hulanda tocante ponemento di sosten disponibel pa tal fin, pa Sint Maarten por pone man
na obra cu e proyectonan esencial aki. Den caso di maneho financiero, Cft a pidi atencion tambe pa
maneho di activo, incluyendo e biennan di capital transferi for di e fondo fiduciario.
Fondo Fiduciario
A pesar di e crisis di e pandemia di Covid-19, toch den e ultimo añanan a logra basta progreso den e
proyectonan di e Fondo Fiduciario. A cuminsa cu reconstruccion di e terminal di aeropuerto y lo finalis’e
na 2023. Cu interes Cft a tuma nota di e proyectonan cu ta pone capital di trabou y prestamo suave na
disposicion di empresa chikito y mediano y ta mehora resiliencia social di e poblacion. Algun proyecto
den e ambito di ordenamento teritorial lo rekeri un horizonte mas aleu cu 2025.
E miembronan di Cft di Corsou y Sint Maarten a haci un bishita na Sint Maarten di dia 2 te cu dia 4 di
november 2021 y a hiba combersacion cu Gobernador suplente, Ministro di Finansa, Conseho di Ministro
y e Comision Financiero di Parlamento. Cft a bishita tambe Oficina di Planificacion di Recuperacion
Nacional (NRPB), Aeropuerto Internacional Prinses Juliana (PJIA), Controlaria General di Sint Maarten
(ARS) y e Ehecutivo di Seguro Medico Social (SZV). Dia 1e. di november Cft Boneiro, Sint Eustatius y Saba a haci un bishita na Saba y a hiba combersacion cu Colegio Ehecutivo, Conseho Insular y e Compania di Electricidad di Saba.
