Un di e grandinan di músika di Kòrsou a bai. E leyenda di tumba original di Kòrsou i di e vershon nobo tumba-di-karnaval ku e mes a yuda krea den e último parti di siglo pasá. Un di e kuidadónan mayó di e balor i aspekto herensial di e género musikal afrokurasoleño tumba un fenómeno sosial ku un base fuerte afrikano. E palabra “tumba” ta aparesé den un di e lenganan tonal bantú kongoles. E ta para pa un enkuentro popular kaminda pueblo ta bini huntu pa kanta, balia i dibertí. Tumba ta un ekspreshon kultural ku a nase den siglo 19 komo un vershon ekspresivo genuino di e suela i pueblo riku di Kòrsou. Tumba ta un herensia kultural intangibel sumamente importante ku a pasa di generashon pa generashon yega serka nos. Mediante e ekspreshon aki nos komo pueblo a kuminsá e proseso di rekobrá i reforsá su identidat nashonal i e sentido di pertenensia na Kòrsou i su kultura. E ta un ekspreshon musikal popular bibu bibu ku tur yu di Kòrsou konosé i sa di dibertí kuné.
Tur yu di Kòrsou a yega di dibertí i gosa di tumba den kualkier di su kantidat di vershonnan. Asina nos konosé tumba di kaha di òrgel, tumba di muzik di zumbi, tumba di típiko, di konhunto, orkesta, trio, aguinaldo, grupo rítmiko, solista kitarista i solista pianista. I den e último dekadanan e género kontemporaneo “tumba-di-karnaval”.
Tumba ta bibu tambe serka griotnan kurasoleño manera Tio Ali, Tio Sandy, Pòpchi Soli i vários mas. Tumba ta bibu i presente den lèsnan na skol di fundeshi i skol avansa.
Tumba ta bibu serka praktikamente tur yu di Kòrsou pasobra na kualkier fiestin òf enkuentro den seno familiar òf di amistat ta kuminsá bati riba mesa bati man kanta i balia kualkier kantika. E ritmo ku ta vigente na e okashonnan ei ta tumba.
Tumba ta un ekspreshon popular ku un karakter sosial i ta apresiá i gustá pa e gran mayoría di yu-di-Kòrsou. Anselmus Boi Dap a sa di yuda konservá e balor históriko i nifikashon importante di tumba. Ku su aktividat komo artista i músiko el a yuda duna nos komo yu di Kòrsou un ekspreshon pa tene na dje, pa ta orguyoso di dje i pa saka nos kara. El a inspirá hopi aki na Kòrsou grandi i chikí pa kanta, balia, komponé i selebrá tumba. Ku otro palabra Anselmus Boi Dap a yuda kulturisá nos i lanta nos kara pa mustra nos ku loke ta di bo bo tin ku apresié i stim’é. Esaki a sosodé no aki na Kòrsou so pero tambe pafó di Kòrsou entre otro na Aruba i Boneiru.
Pa su kontribushon magnífiko na kultura i herensia kultural di Kòrsou e leyenda Anselmus Boi Dap meresé un dia di luto nashonal konvoká pa gobièrnu di Kòrsou.
Na famianan kondoler di pièrdè i forsa pa karga ku e pèrdida tan grandi i sensibel aki. Kondolensia tambe na pueblo kompletu di Kòrsou pa e desaparishon físiko di e leyenda Boi Dap yamá tambe tata i emperador di tumba.
Boi Dap su legado lo keda pa semper komo inspirashon i material edukativo i emansipativo pa sigui konsientisá i krea e yu di Kòrsou nobo
1 comment
[…] Source link […]