Recientemente, Santa Rosa tabata tin e grato placer di a ricibi bishita di Ing. Sr. Edward Berben, kende ta e ex Director di DLVV Boneiro y un persona cu amplio expertisio ariba criansa di bestia chikito. Recientemente, Sr. Berben a duna un workshop na Boneiro ariba petición di DLVV, pa stimula e Criador di bestia chikito pa structura nan maneho y alavez mustra con pa saca mas probecho door di combina cierto rasa local cu rasa nan puro. E workshop tabata sumamente exitoso y a logra comparti hopi información cu e criadonan.
Durante su bishita na Santa Rosa, Sr. Berben a haya un guía den Santa Rosa hunto cu director Sra. Nathalie Maduro. Acerca Sr. Berben pa sondea e posibilidad di duna training pa tur empleado den e Seccion di Criansa como tambe pa ofrece un workshop similar cu a wordo hasi na Boneiro pa tur criador di bestia chikito di Aruba. Durante e bishita na Santa Rosa, Sr. Berben a probecha pa será conocí cu diferente seccionnan di criansa cu tin, manera entre otro, e sección di Cabrito, Carne, Baca y Porco.
Actualmente na Santa Rosa, tin un cantidad di Cabrito dunando luz y Sr. Berben a probecha pa di inmediato duna e trahadonan di Santa Rosa algún conseho ariba e maneho di e lamchinan y con pa hasi control ariba nan nutrición y desaroyo. Pa locual ta trata e sección di criansa di Porco, Ela bishita e parti caminda mama nan ta wordo aparta cu e baby nan recién naci y a haya información di kiko ta tur ta e diferente rasa nan di Porco cu Santa Rosa ta ofrece na benta na e criadonan registra. Alavez ela mira e grupo cu actualmente ta na benta.
Pa locual ta e parti di Criansa di Baca, ela keda asombra cu e rasa Jersey cu Santa Rosa tin pa bende cu criadonan local interesa cual ta un rasa cu conocí pa un producion halto di lechi, te hasta den nos clima cayente. Sra. Maduro alavez a mustre locual ta conocí como e “Melk kamer”, cual actualmente ta den proceso di renovación y cu pronto lo ta bek den operación pa Santa Rosa por inicia bek cu benta di lechi fresco Baca y Cabrito.
Por ultimo a pasa na e seccion di plantación di hooi, caminda cu Sra. Maduro a splica cu Santa Rosa ta planta su propio hooi pa asina mustra na e criadonan con por yuda baha nan gasto di cuminda door di tin un seccion special pa plantación di hooi den nan cunucu. Sr. Berben a keda masha satisfecho cu e bishita y información cu ela ricibi. Ela expresa cu Santa Rosa su Seccion di Criansa tin hopi potential y a ofrece su disponibilidad pa brinda conseho y guía den área nan caminda cu e por aporta. Di acuerdo cu Sra. Maduro, “Nos sector di criansa ta forma un parti integral den nos seguridad di cuminda, especialmente awor cu por premira cu e prijs di alimento importa lo sigi subi. Ta importante pa nos por por saca mas probecho posibel for di e industria di criansa local door di sostene nos criadonan cu información, guía y alavez compra di nan producto nan fresco.”
Santa Rosa kier recorda tur criado pa corda hasi nan cita trempan na Servicio Veterinario ya cu esaki ta e temporada di fin di aña caminda hopi cliente lo desea cumpra carni fresco. Tambe nos kier informa na tur Cunukero, Criado y Piscado cu ta desea pa nan información di nan productonan pa benta sali ariba e pagina di Social media di Santa Rosa, por manda un mail cu tur información y potret di nan productonan libremente na info@santarosa.aw
