Durante conferencia di prensa di Gobierno di Aruba dialuna mainta, Prome Minister Evelyn Wever-Croes a elabora riba e areanan di preocupacion cu CAFT a indica den nan conferencia di prensa siman pasa.
Turismo y Economia:
Nos turismo ta bayendo bon y nos economia a cuminsa crece. Sinembarto, Prome Minister a enfatisa cu ainda Aruba no ta caminda cu e mester ta. Ni turismo mes a yega riba e nivel cu e tawata prome cu e pandemia. Si tur cos bay manera Gobierno ta premira, pa fin di aña nos turismo lo recupera na 70 pa 75 porciento di e nivel cu e tawata ta prome cu Covid. Apesar cu e no ta 100 porciento, e ta bay bon compara cu otro paisnan, Prome Minister a duna di conoce.
Unda bes cu turismo yega 100 porciento manera e tawata prome cu Covid, cu ta proyecta pa otro aña, economia lo bay bek na e nivel cu e tawata pero lo dura mas pa finansas bay bek unda cu e tawata ta. Apesar cu turismo ta bayendo bon y economia a cuminsa lanta bek, keto bay Aruba ta den e problema sumamente dificil financieramente causa door di e pandemia.
Gasto di salud:
Gasto di salud ta un otro area cu tin problema. Den su conferencia di prensa, CAFT un biaha mas a trece dilanti e tema di 60 miyon floin. “Pa nos ta honesto, Gobierno tambe sa cu e gastonan di salud manera nan ta awo, no por continua”.
Prome Minister a duna di conoce cu si no bin cambio riba gastonan di salud, aki dos pa tres aña lo mester hisa primanan y of baha e pakete. Mester tuma un decision pa no perde AZV completo cu lo haci hopi mas daño na henter nos comunidad. Gobierno ta trahando riba un plan di accion pa atende e casonan aki di salubridad riba termino cortico, termino mediano y termino largo.
Gastonan di personal di Gobierno:
Un otro area di preocupacion cu CAFT a menciona ta gastonan di personal di Gobierno cu nan a indica mester baha. Specificamente, CAFT a menciona ‘overtime’ cu ta demasiado halto na Aruba compara cu otro paisnan. Tambe nan a menciona e ‘periodieke verhogingen’ cu empleadonan publico ta haya automaticamente riba base periodico. Ambos ta temaman cu Gobierno ta trahando riba nan buscando e manera pa baha y mitiga nan. Nan no por sigui crece manera nan ta creciendo pasobra simplemente no por paga.