Campaña anual di vacunacion contra
Influenza a cuminsa y Departamento di Salud Publico ta haci un yamada na e
gruponan di risico pa pasa busca nan vacuna completamente gratis na un di e
localidadnan cu mas ta combiniente.
Bou di grupo di riesgo nos ta referi na personanan cu ta na risico pa desaroya
complicacionnan grave manera bronkitis y pulmonia pa motibo di griep. E
personanan aki ta e adulto mayor di 60 aña of mas y tambe personanan menor di 60
aña pero cu ta sufri di malesa cronico, malesa di nan sistema respiratorio y tambe
personanan obeso, na estado of cu tin un sistema inmunologico abou door di
malesanan manera cancer y HIV.
Pa por busca e vacuna di influenza na un di e siguiente localidadnan, e adultonan
mayor di 60 aña mester presenta solamente cu su carnet di AZV valido. E grupo na
risico bou di 60 aña mester presenta cu nan recept di doctor di cas y nan carnet di
AZV.
Aki bou ta sigui un lista di e diferente dia y localidadnan unda nos enfermeronan lo
bay ta aplicando e vacuna di influenza.
Dia 01 y 02 di november na Centro di Bario Playa Pabou
entre 9or y 12or di mainta
Dia 03 y 04 di november na Centro Curazon Santa Cruz
entre 9or y 12or di mainta
Dia 05 y 08 di november na Centro di Bario Brazil
entre 9or y 12or di mainta
Dia 09 y 10 di november na Centro di Bario Noord
entre 9or y 12or di mainta
Es cu no ta cay bou grupo di risico pero kier cumpra e vacuna, esaki NO ta posible
na e postnan ariba menciona, pero si na seccion di Malesanan Infeccioso. Es cu kier
cumpra vacuna mester haci un cita via number di telefon 5224239 of 522441. E
vacuna tin un costo di fl 20,- cu por wordo paga unicamente electronico (swip) no ta
permiti placa cash.