Prome evento pa agentenan di biahe na Hulanda Aruba ta haya “feedback” hopi positivo na TravDay 2021

Recientemente 70 compania y destinacionnan turistico a haci uzo di e oportunidad pa presenta nan
producto y servicionan na un “trade show” yama TravDay, na Hilversum. E evento na Hotel Gooiland,
unda 120 agente di biahe a participa, tabata e prome di su tipo y grandura pa tuma luga na Hulanda
despues di 18 luna di cancelacion di eventonan debi na e progreso di e pandemia causa pa e virus di
Corona.
Banda di e agentenan di biahe, 600 bishitante a acudi na TravDay pa busca informacion y haci pregunta,
den e proceso pa scoge unda nan lo pasa nan siguiente vakantie.
“Nos tin respet pa e balor demostra. A tuma e decision hopi tempran e aña aki, y ata nos aki, pabien,”
asina Tirso Tromp a expresa e aprecio y respet di parti di Aruba Tourism Authority pa e organisacion di
TravDay den “TAT’s Travel Podcast” cu a wordo graba durante di e evento.
Tabata e momento perfecto pa reconecta cu e agentenan di biahe cu ta ofrece Aruba como destinacion
turistico na nan clientenan. Na e evento estilo “marketplace” Aruba tabatin un “stand” unda cu e
agentenan di biahe por a pasa entre otro pa cera conoci cu Aruba, haci pregunta general y specifico, pidi
asistencia y conseho relaciona na peticionnan specifico di nan clientenan, etc.
Mayoria pregunta tabata basa riba e rekisitonan cu Aruba tin pa cu maneho di COVID, y informacion
general di Aruba.
E reaccion cu a ricibi di e agentenan cu ta sigui desaroyonan rond mundo di cerca pa por duna nan
clientenan e miho conseho, tabata masha positivo. Un factor cu a destaca ta e comentarionan encuanto
di e forma eficiente y bon coordina cu Aruba a maneha su informacion, y e comunicacion encuanto di
rekisitonan y protocolnan cu tabata hopi cla y completo for di cuminsamento di e pandemia.
Como un gesto special, Aruba Tourism Authority a organisa un rifa di cinco botter di “Aruba rum” entre
tur agente di biahe cu a bishita nan stand. Nan por a scan un QR-code y registra pa participa. Tambe a
invita nan pa purba e ‘’special edition’’ Aruba rum di Spirited Union Distillery cu ta e prome destileria di
rum botanico na mundo y e doño ta un Arubiano, Ruben Maduro.
Por scucha e podcast cu Tirso Tromp na https://anchor.fm/travelpro/episodes/Afl–58-TATs-Travel-
Podcast-met-Minet-van-Wees-TravelXL-en-Tirso-Tromp-Aruba-Tourism-Authority-e17v2vd.