Dr. Horacio E. Oduber Hospital a eligi su empleado di luna di september cu ta traha na departamento di oncologia. Ta trata di Yolanda Levestone, oncologie verpleegkundige kende no tabata prepara p’esaki. Ela keda hopi sorprendi ora ela mira tur su coleganan hunto cu Jacco Vroegop, Director di HOH, drs. M. Ladenius, Internist-Oncoloog y diferente manager y hasta miembronan di su famia ta warda riba dje pa dune e grato noticia. A felicita Yolanda pa su tremendo empeño y tur presente por a scucha kico e ta nifica pa su coleganan y pashentnan. Yolanda ta un trahado dedica, servicial, professional y colegial. Un bon teamplayer pa su coleganan y ademas, e tin un bon cooperacion cu e specialistanan.
Drs. Ladenius, Internist-Oncoloog a duna di conoce cu Yolanda Levestone ta un di e forsanan cu ta pusha y percura tur dia p’e trabounan y situacionnan cu nan ta encontra. E no ta facil, pero ta hopi importante pa cuida e departamento aki cu nos tin mester aki na Aruba. E pashentnan ta sinti e amor cu e nursenan ta duna y esey ta algo cu drs. Ladenius ta orguyoso di dje. “Yolanda, bo ta un persona special, tur dia semper bo ta percura no solamente p’e area cu bo ta traha, pero tambe p’e extra atencion cu bo ta duna pashent. Bo merece di ta e empleado di luna”, asina Drs. Ladenius a termina.
Yolanda a cuminsa traha na HOH como ziekenverzorgster den e inservice opleiding di HOH sigui pa e Verpleegkundige opleiding. Despues ela sigui na Hulanda e specialisacion pa Oncologie verpleegkundige y awo tambe ta verpleegkudige coördinator na departamento di oncologia. E pashent ta su prioridad y e ta dedica su tempo na e pashent y su famia. Aunke e trabou ta trece su reto cu ne semper e ta keda cu un smile na su cara y ta sigui yuda su coleganan caminda mester. Yolanda semper ta scucha y tin empatia pa e pashent. E ta duna conseho na e famia tambe y e t’ey pa nan pa yuda unda cu e por. Hasta den su tempo liber e ta organisa actividadnan cu e pashent p.e. traha “bookmarks” na cas pa inspira su pashentnan cu mensahenan positivo pa motivacion den e momentonan dificil cu nan ta pasando cu tratamentonan. E ta dinamico y ta adapta na cambio pa asina eherce su trabao manera mester. Como verpleegkundige coördinator e ta inspira confiansa na su coleganan y semper tin tips con pa mehora servicio riba e departamento. E ta motiva pa siña y ta dirigi riba resultado
Vivian Kabelefodi, oncologie verpleegkundige, a duna di conoce cu e team ta uno chikito y Yolanda ta bay e extra mile pa tur cos bay bon p’e team y nan pashentnan. Pa por a prepara tur cos sin cu Yolanda sa, no tabata facil. A logra convence pa bay hospital pa asina na e policlinica coleganan por a prepara pe celebracion aki. Sigur e tabata un surprise grandi pe ora nan regresa y un momento cu nunca e lo lubida. Yolanda Levestone a gradici su coleganan pe tremendo surprise y ta conta cu loke e ta haci ta bin semper di su mes, di su curason. Masha pabien Yolanda cu e bunita reconocemento aki!
