E mundo ta birando dia pa dia mas duro, hende ta sera curazon pa otro, esun cu ta come, no ta corda riba esun cu no por come, nos ta simplemente bisa algo, y esey mester sosode ,y esey ta tur cos.
Pero Dios si tin misericordia, pa nos tur, y ora bo tiin misericordia cu hende, Dios lo tin misericordia cu bo, pasobra su palabra ta bisa , cu misericordia lo wordo duna na esun cu tin misericordia.
Misericordia ta un palabra bieu , cu e generacion nobo aki no ta usa mucho, ni tampoco e palabra compassion ta wordo menciona, pero ta pa medio di misercordia y compassion di Dios cu hende ta wordo bendiciona.
E ciego Bartimeo a grita, Hesus yiu di David tene misericordia dimi, esey ta nifica: Tene compassion y laga Bo Gracia favorece mi.
Misericordia ta bini for di trono di Dios, y E ta pone riba curazon di esnan cu ta dispuesto pa aplike den bida di otro.
Pasobra dureza di curazon ta na moda, curazon di Hero, y di Piedra ta manda den hogarnan caminda auque nos ta mira cu yiunan ta wordo perhudica toch nos ta sigi cu dureza di curazon.
Hopi biaha nos ta mira comportacion di mayor y nos ta puntra nos mes , e persona aki no tin misericordia, e no ta sinti cu e ta haci su famia daño, y no ta mira cu su yiunan ta bay perdi, ta lubida e a lubida su responsabilidad.
Beibel ta bisa cu den ultimo tempo e amor di hopi lo fria. Hende ta biba sin ningun clase di compromiso cu Dios , nan mes ta kita, nan mes ta pone, nan mes ta stroba y nan mes ta dicta, sin ningun clase di misercordia, , sin temor di Dios.
Dios no kier pa nos biba asina cu otro, Dios a bisa stima bo prohimo manera bo mes, y practica misericordia riba tur cos.
Hebreonan capitulo 4 vers 16 ta bisa: Pesey laga nos aserca e trono di gracia cu confiansa pa nos ricibi misericordia y haña gracia pa yuda den tempo di necesidat.
Santiago capitulo 4 vers 13 ta bisa : Pasobra huicio lo ta sin misericordia, pa cu esun cu no a mustra misericordia, Misericordia a triunfa riba huicio.
Ta solamente e misericordia di Dios por guia nos den un mundo cruel y duro, y solamenete e misericordia di Dios por duna nos e Victoria.
Cada biaha cu abo como mayor ta guia bo yiunan den e caminda di Dios, bo ta guia nan na misericordia, bo no ta laga nan pa nan cuenta, pero bo ta mustra nan, cu tin speransa den Cristo Hesus.
Proverbio capitulo 3 vers 3 +4 ta bisa: No laga nunca misericordia y bondad bandonabo, mara nan rond di bo garganta , scirbi nan riba tabla di bo curazon.
Asina lo bo haña y aprobacion den bista di Dios y hende.
Laga cada hogar ta yena cu misericordia y bondad, pasombra esey ta activa e presencia di Dios.
Sinceramente
Pastor Marcel Balootje.