Dialuna 4 di oktober ultimo Fundacion Movemento Ta Bida ( FMTB) a duna inicio na un otro proyecto sumamente valioso.
Ta trata aki di un Copy Center, cual lo hiba e nomber “Copy Center 60+”. Un idea cu a nace for di basta tempo, pero mester bisa un bunita idea por cierto, pero tambe sumamente costoso.
E nomber ta papia pa su mes
Copy Center 60+ lo ta principalmente disponibel y na ordo na nos mas di 30 gruponan activo di 60+, tur rond di Aruba y registra serca Grupo Nucleo. Na hopi ocacion, gruponan tawatin mester di algun copia pa nan miembronan y mester a paga sumanan, cu pa cada grupo tawata pisa enorme ariba nan presupuesto, y Fundacion tawata na altura di esaki.
E idea a cuminsa haya forma
Asina a cuminsa pidi ofertanan pa huur di un machine di copia na e diferente comerciantenan grandi riba nos isla, na jan/febr 2020. Pa FMTB, e prijsnan ofresi tawata impagabel, y por bisa cu casi e idea a muri.
Delta Blue Electronics
Pa sorpresa di FMTB, a dura un par di siman y a drenta un yamada di Delta Blue cu un proposicion ,si nos lo kier purba un mashine segunda mano den bon condicion, cual lo wordo entrega bek despues cu e contract a vence entre Delta Blue y e comerciante. Hunto a delibera ariba esaki y a dicidi positivamente y e idea a bolbe a haya bida. Lamentablemente e deal no a bay door y nos mester a warda un par di siman mas, pasobra lo bay drenta un otro mashine, mas nobo, mas moderno y den super bon condicion. Cu e diferenia grandi cu lo no bay tin ningun huurovereenkomst pero cu Delta Blue Electronics lo bay regala e machine na FMTB, considerando e bunita idea pa nos adultonan mayor.
Esaki tawata e desicion mas bunita y importante cu FMTB por a haya. Nos no a spera e noticia aki, pero ta conosi cu Sr y Sra Britten nan curason ta na e banda corecto den nan pecho y serca di esnan mas vulnerabel, esta serca nos mucha y hobennan, nos hendenan special y nos adultonan mayor. Sr Osmar Britten, actual Gerente di Delta Blue Electronics hunto cu Sra Ingrid Croes-Dubero, voluntario di FMTB y alabes mentor, tawatin e honor di a corta e sinta y habri e Copy Center 60+ oficialmente den presencia di sr Alvan Arends di Delta Blue, sr Rudy Leysner y sra Greta Illes-Paesch di parti di directiva di FMTB, sra Rosa Leon, coordinador di Proyecto Hunto Grandi Grandi Hunto y e mentornan sra Stella Geerman y sra Lupita Gil.
Cede Aruba
Di parti di Cede Aruba, FMTB a logra haya e parti financiero pa cubri gastonan relaciona cu mantencion y compra di parts, si ta necesario, di e mashin, durante un temporada.
Copy Center 60+ ta situa den edificio di IBISA den oficina de FMTB na Frankrijktraat 1. A scoge e lokalidad aki, pa motibo cu esaki ta conosi caba pa mayoria dirigentenan di e diferente gruponan di 60+ y tin amplio lugar pa parkeer, ta na e piso abao y facil accesibel, hasta cu rolstoel. Lo bay duna servicio di saka copia, plastifica documentonan, inbinden etc. etc. na un prijs sumamente barata. E Centro lo bira operacional entrante 8 di november en adelante y dia(nan) y orario lo wordo anuncia dentro di poco.
PABIEN NA FUNDACION MOVEMENTO TA BIDA CU UN OTRO PROYECTO BALIOSO PA NOS ADULTONAN MAYOR Y UN DANKI DI CURASON NA DELTA BLUE ELECTRONICS PA NAN APORTE INCONDICIONAL Y NA CEDE ARUBA PA NAN CONTRIBUCION.
