Frakshon di MAN kier sa kon ta para ku situashon finansiero di pais Korsou

Resientemente nos a tuma nota di komunikado di prensa emití pa Minister di Finansa 24 sèptèmber último. Den e komunikado minister ta indiká ku den e último Konseho di Minister di Reino no a honra Gobièrnu di Kòrsou fiansa pa loke ta sosten di likides pa nos presupuesto.

Den e komunikado minister ta referí na un petishon di 203 mion florin te ku fin di aña, pero ku CFT a konsehá Konseho minister di Reino pa solamente 76 mion florin.
Minister a indiká diferente punto den kual a kòrta den dje i di kua a yega na 76 mion florin pa Kòrsou.

Pa nos ta importante pa risibí informashon pero tin klaridat riba e situashon finansiero aktual di gobièrnu pero tambe ehekushon di Gobièrnu su presupuesto. Banda di esaki tambe a indiká 5 kondishon kual Gobièrnu mester kumpli kuné pa bini na remarke di e fiansa.

Konforme artíkulo 96 di reglamento di órden parlamento nos frakshon a hasi e siguiente preguntanan na Minister di Finansa:

1. Minister por kompartí ku parlamento e petishon di fiansa ku a bai pa Konseho di Minister di Reino? 
2. E konseho di CFT riba e petishon di fiansa I pronóstiko di likides aktualisá por keda pone pa parlamento? 
3. Pa loke ta e situashon finansiero di pais, kon gobièrnu su posishon ta den kumplimentu ku su obligashonnan?
4. Ki efekto e no otorgamentu di e fiansa tin pa ku ehekushon di presupuesto? 
5. Ki ta e motibu di tur e kortenan ku minister a indiká den e komunikado? 
6. Pa loke ta e kondishonnan menshoná den e komunikado aki ta gobièrnu su posishon riba esakinan? 
7. Kon gobièrnu tin pensa pa atendé ku e kondishonnan?