MPB ku direktiva nobo

Den un reunion ofisial di direktiva di partido Movementu di Pueblo Boneriano (MPB) un
direktiva nobo a keda instalá i inskribí ofisialmente na Kámara di Komersio. E direktiva nobo ta
konsistí di Vice presidente: Cyrill Vrolijk, Sekretario: Desiree Croes, Tesorero Sanne Meijer i
miembronan Jendell Birginia, Roderick Martes, Chon Theodora, Meridith Jansen, Orphaline Saleh i
Elvis Tjin Asjoe.
MPB a wòrdu fundá statutariamente 15 di desèmber 2013 ku e ideologia Kristian-Sosial. Promé ku
MPB a lanta un enkuesta a wòrdu hasí pa saka afó kiko tabata biba politikamente den pueblo
Boneriano. Loke a sali afó e tempu ei tabata ku pueblo Boneriano tabata deseá un kambio den nan
kondishonnan di biba kargá ku un forma nobo di hiba polítika ku lidernan nobo. Ku e deseo di pueblo
aki MPB a lanta i gana elekshon 15 di Mart 2015 ku 3 asiento i pa 4 aña despues 20 di Mart 2019
MPB bolbe gana elekshon pero e biaha aki ku 4 asiento.
For di 8 di Aprel 2019 MPB ta forma parti di koalishon i konsekuentemente e gobièrnu i ta
agradesido pa e konfiansa di nos aliado di koalishon i pa e stabilidat ku a keda mantene henter e
periodo di gobernashon aki. Esaki ta e promé koalishon despues di 101010 ku ta rumbo pa sinta
henter e periodo di gobernashon.
MPB ta gradisí e direktiva saliente pa e konfiansa i trabounan desplegá pa 6 aña largu. E
miembronan di direktiva saliente ta: Ibi Antonius, Gianni van den Heuvel, Renata Domacassé,
Hennyson Thielman i Serapio Pop. Lo keda mantene e relashon ku e direktiva saliente i nan ta keda
dipuesto pa konseha e partido a base di e eskperiensa optene. Komo lider polítiko Elvis Tjin Asjoe ta
outomátikamente miembro di direktiva for di inisio.
Nos ta desa e direktiva nobo hopi sabiduria pa asina sigui enfrenta tur reto polítiko i hasi lo maksimo
pa kontinua riba e kaminda pa bienestar di nos isla.